13 Օգոստոս, Եշ, Աստվածածնի պահքի Դ օր

Գրքեր
29 Հունվար, Գշ Սուրբ Անդրե զորավարի և նրա բանակի, Կալինիկոս և Դոմետիոս վկաների հիշատակության օր

Անդրե զորավար և իր բանակը

Ծնունդով Կիլիկայից էր Անդրեաս զորավարը, Դիոկղետիանոս կայսեր օրոք Սիրիայի կայսերական բանակում բարձրաստիճան գաղտնի քրիստոնյա զինվորական էր: Պարսիկների դեմ պատերազմի ճակատամարտերից մեկում, երբ նրա բանակը՝ շուրջ 600 հոգի, նահանջելու եզրին էր, նրանց այս անգամ Հիսուս Քրիստոսի անունով քաջալերեց և ետ դարձնելով՝ հաղթանակ ձեռք բերեց: Այս դեպքից ամբողջ բանակը քրիստոնյա դարձավ: Իր սպարապետը, այս ամենի մասին տեղեկանալով, զորք է ուղարկում և երբ նրանք անցնում էին Տավրոսի կիրճով, բոլորին նահատակում է 300 թ.-ին:

 

Կալինիկոս վկա

Գաղատացի մի քրիստոնյա էր, որը զբաղվում էր ձեթի վաճառքով և գործի բերումով վայրից վայր էր գնում և տարածում էր քրիստոնեության լույսը: Ձերբակալվեց և նրան առաջարկվեց ուրանալ քրիստոնեությունը: Երբ մերժեց առաջարկը, չարչարանքների ենթարկվեց, ի վերջո գամերով պատված կոշիկներ հագցրեցին և մինչև Գանգռա քաղաքը վազացրեցին, որտեղ էլ կրակի մեջ նետելով նահատակեցին:

Հայերս նրա հիշատակը տոնում ենք Վարագա խաչին հաջորդող հինգերորդ երեքշաբթի, կամ Ս. Խաչին հաջորդող տասներորդ երկուշաբթի օրը:

 

Դիոմետես վկա (Դոմետիոս)

Դիոկղետիանոս կայսեր օրերում ապրած տարսոնացի մի քրիստոնյա է, ազնվական ընտանիքի զավակ և մասնագիտությամբ բժիշկ: Շրջում էր աղքատ հիվանդներին բժշկելով՝ որքան իր արհեստով նույնքան և ավելի՝ հավատքով: Այդ ճամփորդության ընթացքում հասավ նաև Նիկիա, որտեղ հատկապես սրտապնդում էր հալածվող քրիստոնյաներին: Ձերբակալվեց և դատվելու համար Նիկոմիդա տարվեց: Հակառակ մարտիրոսանալու իր բուռն փափագի, Նախախնամությունը նրան խնայեց և չարչարանքներից զերծ պահեց, սակայն նրան մարտիրոսական փառքով և պսակով վարձատրեց, քանզի շղթայված, չարչարանքի տարվելու ժամանակ, երբ աղոթելու համար մի պահ կանգ առավ, այդ վիճակում էլ ավանդեց իր մաքուր և բարեսեր հոգին 303 թ.-ին:

Հայերս նրա հիշատակը տոնում ենք Ս. Խաչին հաջորդող տասներորդ երկուշաբթի օրը:

 

«Համաքրիստոնեական Սուրբեր», Շնորհք արքեպսԳալուստյան, «ԳԱՆՁԱՍԱՐ» մատենաշարԵրևան1997 

Արևելահայերենի փոխադրեց՝ Վաչագան սրկԴոխոլյանը

ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․