Գրքեր
17 Դեկտեմբեր, Գշ Սուրբ Թեոպոմպոս եպիսկոպոսի, Թեովնաս վկայի և չորս զինվորների` Բասոսի, Եվսեբիոսի, Եվտիքեսի և Բասիլիդեսի հիշատակության օր

Թեոպոմպոս Եպիսկոպոս 

Հայտնի չէ նույնիսկ, թե որ քաղաքի եպիսկոպոսն է եղել: Ապրել է Դիոկղետիանոսի ժամանակներում: Երբ սա հրամայեց իր քաղաքի բնակիչներին երկրպագել կուռքերին, Թեոպոմպոսը չկարողացավ հանդուրժել, այլ առաջ գալով մատնացույց արեց կռապաշտության անամոթությունը: Երբ թագավորը հարցնում է, թե ո՞վ է սա, պատասխանում են. «Սա քրիստոնյաների վարդապետն ու եպիսկոպոսն է»: Երբ թագավորը զայրացած հարցրեց. «Ինչպե՞ս համարձակվեցիր իմ ներկայությամբ այդպիսի բաներ ասել», Թեոպոմպոսը սաղմոսի խոսքերով պատասխանեց. «Վկայում եմ Քրիստոսի մասին «թագավորնների առջև և չեմ ամաչելու»: Այս խոսքի վրա նրան բորբոքված հնոցը նետեցին, որտեղ նա երեք մանուկների օրհներգությունն էր երգում: Նրա չայրվելը կախարդության վերագրեցին և բանտարկեցին, որտեղ քսան օր մնաց անոթի: Դարձյալ թագավորի մոտ տարան և նրա հարցաքննությանը պատասխանեց ասելով. «Իմ Խաչված Աստծո հանդեպ հույսս հաստատուն է, սակայն քեզ հավիտենական տանջանքներ են սպասվում»: Աչքերը հանելով բանտ նետեցին որտեղ շարունակեց սոված մնալ: Ապա կանչեցին Թեովնաս կախարդին և մեծ քանակությամբ ոսկի խոստացան, եթե կարողանա հաղթել Թեոպոմպոսին: Սակայն նրա կախարդությունները սրբին չվնասեցին, որից հետո Թեովնասը հայտարարեց. «Մեծ է քրիստոնյաների Աստվածը և հաղթական է Նրա զորությունը, հավատում եմ Խաչյալ Հիսուս Աստծուն»: Թեոպոմպոսը տակավին շատ այլ չարչարանքների ենթարկվելով գլխատվեց: իսկ Թեովնասը, երբ իր նոր հավատքի մեջ անդրդվելի մնաց, ողջ-ողջ թաղվելով նահատակվեց:

Հայերս նրանց հիշատակը տոնում ենք Հիսնակի պահոց Դ կիրակիին հաջորդող երեքշաբթի օրը:

 

Թեովնաս

Թեովնասը նախ կախարդ էր, որին կանչեցին, որպեսզի հակազդի Թեոպոմպոս Եպիսկոպոսին, որը տոկացել եր անսովոր չարչարանքներին և կրակից չէր այրվել: Սակայն հաղթվելով Թեոպոմպոս Եպիսկոպոսի իմաստությունից և բարոյականությունից՝ քրիստոնեություն ընդունեց և նահատակվեց նույն Եպիսկոպոսի հետ 308 թ.-ին:

Հայերս նրա հիշատակը տոնում ենք Հիսնակի պահոց Դ կիրակիին հաջորդող երեքշաբթի օրը:

 

Բասոս, Եվսեբ, Եվտիք և Բասիլիդես զինվորներ

Սրանք չորս զինվորներ էին, որոնք Թեոպոպմոս Եպիսկոպոսին հսկելու էին կարգված և տեսնելով չարչարանքների ընթացքում նրա ցուցաբերած համբերությունն ու քաջությունը, այնքան ազդվեցին, որ իրենք էլ քրիստոնյա դարձան: Դիոկղետիանոսը նրանց իր մոտ կանչեց և նախ զրկեց նրանց զինվորական բոլոր պատիվներից և ապա հարստությունից և բանտ նետեց: Բասոսը նահատակվեց մարմինը սրով կտոր-կտոր արվելով: Եվսեբի մարմինը մուրճով ջարդեցին: Եվտիքեսին չորս ցցերից կապելով և ձգելով մարմինը կտոր-կտոր արեցին: Իսկ Բասիլիդեսի փորը ճեղքեցին և փորոտիքը դուրս թափեցին: Այսպիսի չարաչար տանջանքներով մարտիրոսացան Քրիստոսի քաջարի զինվորները:

Հայերս նրանց հիշատակը տոնում ենք Հիսնակի պահոց Դ կիրակիին հաջորդող երեքշաբթի օրը:

 

«Համաքրիստոնեական Սուրբեր», Շնորհք աչք. Գալուստյան, Շնորհք արքեպսԳալուստյան, «ԳԱՆՁԱՍԱՐ» մատենաշարԵրևան 1997 

Արևելահայերենի փոխադրեց՝ Վաչագան սրկԴոխոլյանը

ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․