Գրքեր

Անմիտ հարուստի առակի քարոզ

«Տեսէ՛ք եւ զգո՛յշ լերուք յամենայն ագահութենէ, զի ո՛չ եթէ ի մթերից ընչից ուրուք իցեն կեանք նորա»:

«Տեսե՛ք, որ զգույշ լինեք ամեն տեսակ ագահությունից, որովհետև մարդու կյանքը կախված չէ իր կուտակած հարստությունից» (Ղուկ12։15):

Սիրելի´ հավատացյալներ,

Բնաբանիս այս խոսքերը մեր Տեր և Փրկիչ Հիսուս Քրիստոսի պատգամն է՝ ուղղված ողջ մարդկությանը: Քրիստոսի աշխարհ գալը միայն մեկ նպատակ ուներ. այն է՝ մարդկության փրկությունը: Աստվածորդու այս կոչը դարձյալ նրա սիրո արտահայտությունն է: Մարդը հոգևոր և մարմնավոր արարած է, կրում է Աստծո պատկերն ու նմանությունը և աստվածային տնօրինությամբ կոչված է փրկության՝ հավիտենական կյանքի: Աստվածատուր մեր կյանքը կախված չէ հարստությունից, նյութից, այլ՝ Աստծուց:

Այսօրվա ավետարանական ընթերցումը «Անմիտ հարուստի առակն» է ։

«Մի հարուստ մարդ կար, որի արտերն առատ բերք տվեցին: Նա մտածում էր և ասում. «Ին՞չ պետք է անեմ, որովհետև հունձս ամբարելու համար շտեմարաններիս մեջ տեղ չմնաց: Այո՛, գիտեմ, թե ինչ պետք է անեմ. կքանդեմ շտեմարաններս, ավելի ընդարձակները կշինեմ և այնտեղ կհավաքեմ ցորենս և իմ բոլոր բերքերը»: Ապա ինքս ինձ կասեմ.«Ո՛վ մարդ, քանի երկար տարիների համար կուտակած հարստություն ունես, հանգի՛ստ եղիր, կե՛ր, խմի՛ր և վայելի՛ր»: Բայց Աստված ասաց նրան. «Անմի՛տ, հենց այս գիշեր հոգիդ վերցնելու են քեզնից, ո՞ւմ է մնալու քո պատրաստածը» (Ղուկ.12:16-20):

Այս մարդը ուրախացել է իր շատ բերքով և ասում է. «Երկար տարիների համար կուտակած հարստություն ունեմ»: Կուտակած հարստությամբ չէ, որ որոշվում է մարդու կյանքի տևողությունը, առավել ևս նյութական ունեցվածքով չէ, որ պայմանավորվում է մարդու փրկությունը:

Այսօրվա իրականության մեջ առկա է այն իրողությունը, որ մարդը ձգտում է  հարստություն ունենալ և կուտակել ինչ-որ անհայտ, անորոշ նպատակով և ամենացավալին այն է, որ այդ ձգտումի, ճիգի ճանապարհին ոտնահարում, ոչնչացնում, անտեսում ու արհամարհում է հոգևոր և բարոյական արժեքները: Գրպանները կամ պահոցները լցնում են փողով ու թանկարժեք իրերով, բայց նրանց հոգիները դատարկվում են այն բոլոր շնորհներից, որ պարգևել է Տեր Աստված: Մեր Տեր Հիսուս Քրիստոսն ասում է «Ին՞չ օգուտ, եթե մարդ ամբողջ աշխարհը շահի, բայց իր կյանքը կորցնի կամ ինքն իրեն վնասի» (Ղուկ.9:25): Եթե ուշադիր էիք՝ Քրիստոս այն հարուստ մարդուն անմիտ անվանեց, քանի որ այդ մարդը ուրախացել էր նյութի համար, իսկ նյութը, նյութականը՝ ժամանակավոր են և չեն կարող մեր հավիտենական կյանքի երաշխիքը լինել: Ի տարբերություն այդ մարդու Քրիստոս մի ուրիշ մարդու իմաստուն անվանեց (Մատթ.7:24), որն իր տունը շինեց ամուր ժայռի վրա և ո՛չ տեղատարփ անձրևը, ո՛չ սրընթաց գետերը, ո՛չ սաստկությամբ փչող կատաղի քամիները չկարողացան սասանել տունը, այն մնաց կանգուն և անսասան: Աստվածաշնչյան այս ճշմարտությունները լավագույն օրինակը կամ դասն են մեր համար, որպեսզի մեր հոգևոր կյանքը կառուցենք ամուր հիմքերի վրա և ամեն մի ժամանակավոր  ու անցողիկ երևույթ մեր ուրախության (սին-դատարկ ուրախություն) պատճառ չլինի, այլ աստվածային պատգամները՝ իբրև մեր կյանքի սկզբունք ունենալով՝ ջանանք հեռու մնալ մեղքերից, ագահությունից, որի նպատակները նյութն է: Ագահությունը դրամի և ունեցվածքի անհագ ցանկություն է:Ագահությունը մեղք է, որովհետև այդ հոգեվիճակը կրող մարդը կորցնում է իր ներքին խաղաղությունը և ողջ կյանքն ապրում հարստություն կուտակելու բաղձանքով, բայց երբեք չի հասնում իր ուզածին, երբևէ չի գոհանում իր ունեցվածքից՝ մտածելով, որ քիչ է ու ապրում է անհուսության ու տառապանքի մեջ:

Քրիստոնեական առաքինություններին խորթ են նմանօրինակ դրսևորումները։ Քրիստոնյան ապրում է մեղք չգործելու վճռականությամբ և հարության հույսով, գանձն ու հարստությունը կապ չունեն հոգևորի, ներկա երջանիկ կյանքի և նրա հավիտենական կյանքի հետ: Մեր Տերը պատգամում է՝ ասելով. «Ձեզ համար գանձեր մի՛ դիզեք երկրի վրա, որտեղ ցեցն ու ժանգը փչացնում են, կամ գողերը, պատը քանդելով, ներս են մտնում և գողանում այն: Այլ ձեր գանձը (հարստություն) երկնքում դիզեք, որտեղ ցեցն ու ժանգը չեն կարող փչացնել այն, և ոչ էլ գողերը կարող են ձեր պատը քանդելով ներս մտնել և գողանալ, որովհետև որտեղ ձեր հարստությունն է, այնտեղ էլ կլինի ձեր սիրտը» (Մատթ. 6:19-21):

Սիրելինե՛ր, մենք պետք է գանձեր դիզենք երկնքում, հոգևոր գանձեր՝ Աստծուն հաճելի կյանք ապրելով, խաղաղ, բարի, գեղեցիկ ընթացքով, և հոգևոր գանձերն են մեր հավիտենական կյանքի հույսը: Քրիստոսի փրկագործ առաքելությունը ուժ է տալիս մեզ պայքարելու չարիքի դեմ՝ մեղքից զգուշանալով: Մեր մեջ՝ մտքի, գիտակցության ու սրտի մեջ ունենալով Աստծո ներկայությունը՝ կհարստանանք աստվածային շնորհներով, կբարեզարդվենք առաքինություններով և հաղորդակից կլինենք աստվածային ճշմարիտ լույսին: Ահա մեր գանձը:

Դժվարություններ միշտ էլ կլինեն, բայց պետք չէ վախենալ դժվարություններից, չէ՞ որ մեր Տերը մեզ պատգամել է «չվախենալ, այլ՝ հավատալ» (Ղուկ. 8:50): Հավատն առ Աստված մեզ ապրեցնում է և հույս ներշնչում. Պատկերացրե՛ք, նավաբեկությունից փրկված մի մարդու, որ մի տախտակից կառչած տարուբերվում է ծովի ալիքների վրա, մեկ բարձրանում է ալիքի կատարին, մեկ իջնում է ջրի խորքը, շուրջբոլորը խավար է ու ջրի շառաչ: Նա իր մտքում ունի մահվան երկյուղը, գուցե և համակերպվել է մահվան հետ, բայց  փրկվելու հույսը չի կորցրել, ապրելու ցանկությունը նրան ուժ է տալիս դիմակայելու ահավոր փոթորկին՝ կառչած մնալով մի փայտից, և որքան մեծ կլինի նրա ուրախությունը, երբ տեսնի իրեն մոտեցող փրկարար նավի լույսը:

Մեր փրկության լույսը Աստվածն է, որ լուսավորում է մեր կյանքի ուղին, որ չմնանք փոթորկի ու խավարի մեջ, այլ, ապրելու ցանկություն ունենալով, հաստատակամորեն առաջ ընթանանք դեպի մեր Տերը, դեպի մեր փրկությունը՝ մեր ճամփի պաշար ունենալով հոգևոր սնունդը:

Թող ամենաբարի Աստված առաջնորդի ձեզ, որ գայթակղությունների ու մեղքերի մեջ չընկնենք և Աստծո հայրական հոգածությամբ ամբարենք հոգևոր արժեքներ, «քաջալերվե՛ք և ձեր հավատը ձեզ կփրկի» (Ղուկ.8:48):

Շնորհք, սէր և խաղաղութիւն Տեառն մերոյ Յիսուսի Քրիստոսի եղիցի ընդ ձեզ, ընդ ամենեսեանսն. Ամեն:

 

Տեր Վահան քհն. Առաքելյան

24.11.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․