Գրքեր

Առաքինություն, որ զերծ է սահմաններից

Ողորմածությունը մի առաքինություն է, որ զերծ է սահմաններից: Քրիստոնեությունն իր հետևորդներին կոչում է առանց սահմանափակումների սիրել Աստծուն, մերձավորին և ինքն իրեն՝ որպես Աստծո պատկերը կրող արարածի: Հայր Պաիսիոս Աթոսացին ասում է, որ Աստծո կամքի կատարումը ոչ թե Աստծուն, այլ մեզ է հարկավոր. «Մեզ հարկավոր է Աստծո կամքը կատարել, որպեսզի ազատագրվենք մեր հին մարդուց: Հավատավոր մարդու բոլոր ուժերը պետք է ուղղված լինեն նրան, որ նա հավատարմորեն հետևի Աստծո պատվիրաններին: Երբ մարդը ձգտում է Աստծո կամքի կատարմանը, ապա նա մոտենում է Աստծուն, և եթե անգամ չի խնդրում, միևնույն է, արժանանում է աստվածային օրհնության, այլ խոսքով ասած՝ ջուր է խմում բուն աղբյուրից»:

Անսահման սիրո վառ օրինակներից են Քրիստոսահիմն եկեղեցու համայնքային կյանքից ներս իրականացվող սոցիալական ծրագրերը, որոնց շրջանակներում յուրաքանչյուր անդամ իր կարողության չափով, սիրով և հոժարակամ պատրաստ է ձեռք մեկնել իր մերձավորին:

Հուլիսի 13-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը և եկեղեցու սոցծրագրերին մշտապես աջակից ամերիկաբնակ Կարեն Վարդանյանն իր ընտանիքի հետ այցելեցին Սարիբեկյան կարիքավոր ընտանիքին, որ բնակվում է Նոր Արեշ 42 փ. 88/1 հասցեում: Ընտանիքի մայրը՝ Համեստ Մանգասարյանը (40 տ.), ասաց, որ ինքը և իր երկու զավակներն առողջական խնդիրներ ունեն. «Աղջիկս՝ Միլենան (11 տ.), երեք տարի է, ինչ տառապում է շաքարային դիաբետով, ինչի հետևանքով նրա մոտ առողջական այլ խնդիրներ են առաջացել: Չեմ կարողանում աշխատել, քանի որ օրը երեք անգամ ինսուլին եմ ներարկում աղջկաս: Փոքր տղաս էլ արագ քայլելիս կամ վազելիս ընկնում է, և ըստ բժշկի նշանակմամբ, պետք է մերսումների տանեմ: Ես էլ ֆինանսական խնդրի պատճառով առայժմ չեմ կարողացել բուժհետազոտություն անցնել՝ հասկանալու համար, թե առողջական ինչ խնդիրներ ունեմ»:

Սարիբեկյան ընտանիքը ժամանակավոր ապրում է ազգականի տանը, ընտանիքի հայրը մշտական աշխատանք չունի, և ընտանիքը գոյատևում է ընտանեկան նպաստի ու երեխայի հաշմանդամության գումարներով: Տիկին Համեստը նշեց, որ փետրվար ամսից գազի վարձը չվճարելու պատճառով անջատել են իրենց գազը, և ձմռանը ստիպված են եղել տունը ջեռուցել փայտի վառարանով:

Տեր Գրիգորը բժշկության աղոթք կարդաց, այնուհետև Կարեն Վարդանյանն ընտանիքին հանձնեց դրամական օգնություն (100 ԱՄՆ դոլար), իսկ նրա որդին՝ վեցամյա Միքայելը, ընտանիքի զավակներին նվիրեց քաղցրավենիքի փաթեթ:

«Մենք շատ հաճախ ընտանիքով մասնակցում ենք Ս. Պատարագի: Աղջիկս մեծ հավատք ունի, նա հավատում է, որ Աստված կբժշկի իրեն, նա աղոթում է բոլոր երեխաների համար, որպեսզի ոչ ոք չհիվանդանա»,- ասաց Համեստը և իր գոհունակությունը հայտնեց Տեր Գրիգորին ու աջակից ընտանիքին:

 

Կարինե Սուգիկյան

13.07.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․