Արիության և համբերության մասին

«Եթե բնակվելու լինես միաբան եղբայրների հետ,– ասաց հայր Սիսոն,– տեղդ մի՛ փոխիր, որովհետև եթե փոխես, խիստ կվնասվես, ինչպես, թռչունը, որ եթե թողնի խակ ձվերը, դրանցից ձագեր չի հա­նի: Նույնպես և ծերը՝ տեղ փոփոխելուց կցամաքի հավատից և ուխ­տից: Բազում են թշնամու որոգայթները. եթե չկարողացավ աղքա­տությամբ որսալ հոգին, հարստության ցանցերն է դնում նրա առջև. եթե անարգությամբ ու պատկառանքով չկարողանա սայթաքեցնել, գովեստներն ու փառքն է դնում որոգայթ. եթե հաջողություններից չհաղթվի, ցավեր ու հիվանդություններ է բերում. իսկ եթե որկրա­մոլությամբ չկարողանա բռնել, սնափառ պահքերով կորսա հոգին և վրան կթափի ցավեր ու հիվանդություններ, սով ու ծարավ, որպես­զի հոգին դատարկի Աստծո սիրուց: Ուրեմն, եթե մեղավոր լինես, և այս ամենը պատահի քեզ, հիշի՛ր ահռելի տանջանքներն ու անաչառ դատավորին, երբեք մի՛ հուսահատվիր, այլ ցնծա՛, որ այստեղ Աստ­ված կամեցավ ջնջել քո մեղքերի սպիները, և սաղմոսի՛ր. «Խրատելով պատժեց ինձ Տերը, սակայն չմատնեց մահվան» (Սաղմ. ՃԺԷ 18), եր­կաթ լինելով` հրով սրբի՛ր դու քո ժանգը: Իսկ եթե արդար լինես, և ինչ­ինչ ցավեր պատահեն քեզ, մեծամեծ և գերագույն բարիքների կհասնես: Ոսկի լինելով՝ ինքդ հալածիչների հրով կմաքրես այն աղ­տերից. թեկուզ և մարմնիդ հարվածի սատանայի հրեշտակը, ուրա՛խ եղիր, որովհետև Պողոսի վիճակին դու հասար (Բ Կորնթ. ԺԲ 7): Եվ որով­հետև հրով փորձվեցիր և փորձանքներով մաքրվեցիր` ըստ գրվածի. «Անցանք մենք հրի և ջրի միջով, և քո հանգստի մեջ հանեցիր մեզ» (Սաղմ. ԿԵ, 12), ու թե առաջինի մեջ եղար, կմնաս նաև երկրորդի մեջ: Սակայն դու առաքինությո՛ւն գործիր, և ողորմություն կգտնես, ինչ­պես և գրված է. «Աղքատ և տնանկ մարդ եմ ես» (Սաղմ. ԼԹ 18, ԿԹ 6), որպեսզի կրկնապատիկ վշտերի դիմաց նաև կրկնապատիկ հատուցում ստանաս Քրիստոսի շնորհներով»:

«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016