19 Մարտ, Գշ, Մեծ պահքի ԼԷ օր

Գրքեր

«Ասա ինձ, ի՞նչ ունես, որ քո սեփականն է»

Եկեղեցու հայրերը բազմիցս են պատգամում հեռու մնալ ագահությունից, գոհանալ ունեցածով՝ մոռացության չմատնելով կարիքավորներին: «Ասա ինձ, ի՞նչ ունես, որ քո սեփականն է, որտեղի՞ց ես վերցրել և քեզ հետ կյանք բերել…Հարուստները, խլելով ընդհանուրը, դարձնում են իրենց սեփականությունը, քանի որ տիրացել են այդ ամենին ավելի շուտ, քան մյուսները: Եթե յուրաքանչյուրը, իր կարիքի համաձայն, վերցներ իրեն անհրաժեշտը, ավելորդը կհասներ կարիքավորին, և ոչ հարուստ կլիներ, ոչ՝ աղքատ: Մերկ դուրս չես եկե՞լ քո մոր որովայնից և նորից մերկ չես վերադառնալո՞ւ հողին»,- հորդորում է Ս. Բարսեղ Մեծը:

Դեկտեմբերի 30-ին, Զորավոր Ս. Աստվածածին եկեղեցու համայնքը, հոգևոր հովիվ Տեր Գրիգոր քահանա Գրիգորյանի գլխավորությամբ, այցելեց Մալաթիա-Սեբաստիա թաղամասի Շրջանային 2/5 հասցեում վարձակալությամբ բնակվող կարիքավոր ընտանիքին: 81-ամյա Մելոյան Ամալյան իր դստեր և երեք անչափահաս թոռնիկների հետ բնակվում է առանց պատուհանների, փայտի վառարանով ջեռուցվող և անմխիթար վիճակում գտնվող երկու սենյականոց խոնավ բնակարանում: «Սոցիալական խնդիրներից բացի մայրս և տղաս՝ Խաչատրյան Մարտիկը (13 տ.), առողջական խնդիրներ ունեն: Մայրս ինսուլտ է տարել, իսկ տղաս հինգ տարեկանից տառապում է գլխուղեղի քրոնիկ հիվանդությամբ՝ էպիլեպսիայով, երեք տարի առաջ էլ Մարտիկի մոտ հայտնաբերեցին գլխի ուռուցք, որի պատճառով աստիճանաբար նվազում է նրա տեսողությունը»,- ասաց Ամալյայի դուստրը՝ Ղուկասյան Գայանեն (37 տ.): Բոլոր խնդիրների առկայությամբ ընտանիքն ի վիճակի չէ լուծել երեխայի առողջական խնդիրները: Ծայրահեղ վատ վիճակում հայտնված ընտանիքը գոյատևում է ծեր կնոջ թոշակի և ընտանեկան նպաստի գումարներով:

Ընտանիքի հետ զրույցից հետո, Տեր Գրիգորը բժշկության աղոթք կարդաց և ընտանիքին հանձնեց դրամական օգնություն (100 ԱՄՆ դոլար), որ տրամադրել էր Ռուսաստանի Դաշնությունում բնակվող Գոհար Ամիրջանյանը: Ղուկասյան Գայանեն անչափ շնորհակալ էր Տեր Գրիգորին և աջակից անձին՝ ուշադրության և հոգածության համար:

Մարդ էակի կարևոր առաքելությունն է աստվածնմանությամբ բարին արարելը, այս մասին Ս. Գրիգոր Աստվածաբանն ասում է. «Կենդանի մարդիկ մեռածներից տարբերվում են ոչ միայն նրանով, որ շնչում են և արևը տեսնում, այլ նրանով, որ բարի գործեր են կատարում: Եթե մարդիկ բարի չեն գործում, ապա ոչնչով լավը չեն, քան մեռածները»:

 

Կարինե Սուգիկյան

30.12.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․