«Աստված սիրում է ուրախ և առատաձեռն մարդուն»

Մարդկային բազմաթիվ դժվարություններ և հոգսեր հաղթահարվում են Աստծո ողորմածությամբ: Աստված Իր առատ ողորմածությամբ այնքան շնորհներ է պարգևում մարդուն, որ նա էլ իր հերթին ողորմած և գթասիրտ լինի իր նմանի նկատմամբ:

Ողորմածությամբ մարդը շահում է Աստծո հաճությունը, քանի որ Նա է Սիրո, Բարության, Ողորմածության և Կյանքի աղբյուրը: Բացի աստվածահաճո լինելուց, ողորմած մարդը շահելու է նաև Երկնքի Արքայությունը: Մատթեոսի ավետարանում, վերջին դատաստանի նկարագրության մեջ, Թագավորն արդարներին կանգնեցնելու է Իր աջ կողմում, իսկ մեղավորներին ՝ ձախ: Եվ դիմելով ողորմության գործերով զարդարված աջակողմյաններին՝ ասելու է. «Եկե՛ք, Իմ Հոր օրհնյալներ, և ժառանգեցե՛ք այն Արքայությունը, որ պատրաստված է ձեզ համար աշխարհի սկզբից ի վեր, որովհետև Ես քաղցած էի, և Ինձ կերակրեցիք, ծարավ էի, և Ինձ ջուր տվեցիք, օտարական էի, և Ինձ ընդունեցիք, մերկ էի, և Ինձ հագցրիք, հիվանդ էի և Ինձ խնամեցիք, բանտում էի, և այցելեցիք Ինձ» (Մատթեոս 25:34-36):

Շարունակելով աստվածահաճո իր ընթացքը՝ Զորավոր Սբ. Աստվածածին եկեղեցու համայնքը՝ հոգևոր հովիվ Տեր Գրիգոր քահանա Գրիգորյանի և խորհրդակատար Տեր Վահան քահանա Առաքելյանի հետ միասին, փետրվարի 22-ին այցելեց Նազարբեկյան 48 կիսակառույց շենքի 18-րդ բնակարանում ապրող կարիքավոր ընտանիքին: Տանիքի բացակայության պատճառով, 9-րդ հարկի երեք սենյականոց խոնավ բնակարանում ապրող Կուրղինյան ընտանիքը փորձում է փայտի վառարանով գոնե սենյակերից մեկը քիչ թե շատ չորացնել: 53-ամյա Կուրղինյան Մելանյան ապրում է իր դստեր՝ 33-ամյա Անուշ Ամիրշաջյանի և երեք անչափահաս թոռների հետ: Շաքարախտ և սիրտ-անոթային հիվանդություններ ունեցող Մելանյան այժմ նաև երիկամի վիրահատության խնդիր ունի, դուստրն էլ առողջական խնդիրների պատճառով մեկ տարի է, որ չի աշխատում: Քահանաները բժշկության աղոթք կարդացին ընտանիքի համար և հանձնեցին համայնքի կողմից տրամադրած սննդի փաթեթներ, հիգիենայի պարագաներ և դրամական օգնություն: Տեր Վահանը հոգու և մարմնի առողջություն, ուժ, կարողություն մաղթեց կարիքի մեջ հայտնված այս ընտանիքին:

«Աստված սիրում է ուրախ և առատաձեռն մարդուն. աղքատին ողորմություն անողն ինքն էլ պիտի կերակրվի» (Առակներ 22:9):

Կարինե Սուգիկյան