Գրքեր

Աստվածածնի Ավետման տոնի քարոզ

Սիրելի՛ հավատացյալ քույրեր և եղբայրներ.

Այսօր Հայ Առաքելական Սուրբ Եկեղեցին նշում է Ավետման տոնը: Այն ազդարարում է մարդկության փրկագործության աստվածային տնօրինության սկիզբը: Այս օրը Սուրբ Մարիամ Աստվածածնին նվիրված հերթական տոներից է մեզ համար:

Սուրբ Աստվածամայրը սիրո ու խաղաղության մի խորհրդանիշ է, որին հավերժ դիմում են բոլոր ազգերը և մարդկային սերունդները: Եվ նա երբեք հուսախաբ չի անում իրեն դիմողներին: Աստվածածնի հղիության ավետիսը այսօր կարծես միախառնվել է մեր Տիրոջ հարության ավետիսին, երբ շարունակում ենք տոնախմբել և միմյանց փոխանցել բոլոր ժամանակների մարդկության Փրկչի հարության բարի լուրը: Ուստի՝ կրկնակի տոն է այսօր և կրկնակի ուրախություն:

Սուրբ Մարիամ Աստվածածինը մեր ժողովրդի հավատքի կյանքում իր ուրույն տեղն ու դերն ունի, այդ են վկայում նրա անունը կրող մեր բազում եկեղեցիները, այդ թվում և մեր Զորավոր Սուրբ Աստվածածին եկեղեցին: Սուրբ Կույսը ավետարաններում աչքի է ընկնում քիչ խոսքերով, սակայն խոսուն վարքով: Մենք նրանից մշտապես սովորում ենք: Եվ ոչ միայն: Սուրբ Աստվածամայրը ցանկացած քրիստոնյայի համար ոգեշնչման աղբյուր է: Երբ տրտմում և հյուծվում ենք կյանքի փորձությունների հորձանուտում, նրա աղոթքներին ենք ապավինում, քանի որ նրա աղոթական միջնորդությունը մեզ համար ուրախության և ցնծության առիթ է, որ պարգևել է մեզ Աստծո Միածին Որդին: Նրա հարկերը միշտ բաց են հավատացյալ մարդկանց խնդրանքների համար, նա աչալուրջ է և հոգատար ցանկացած աղոթքի նկատմամբ: Քանի որ իր իսկ կոչման և առաքելության մեջ նա հավատարիմ, աչալուրջ և հնազանդ էր, հետևաբար օգնում և աջակցում է նաև մեզ մեր կոչման և առաքելության մեջ:

Սուրբ Կույսից պիտի սովորենք մաքուր պահել մեր իսկ հոգու տաճարը՝ Տիրոջ բնակության համար: Երբ մեր Տեր և Փրկիչ Հիսուս Քրիստոս մտավ Երուսաղեմի տաճար (Հովհաննես 2:13-22) և տեսավ, որ այնտեղ արջառներ, ոչխարներ և աղավնիներ են վաճառում, չվանով բոլորին տաճարից դուրս հանեց՝ ասելով. «Դրանք այստեղից վերցրե՛ք և իմ Հոր Տունը վաճառատան մի՛ վերածեք» (Հովհաննես 2:16): Տիրոջ համար ասված «Քո տան նկատմամբ նախանձախնդրությունը ինձ պիտի ուտի» խոսքերը վերաբերում են նաև մեզ՝ մահկանացուներիս, մենք ևս պետք է ուշադիր լինենք ամեն մոլախոտի և որոմի նկատմամբ, որոնք կաճեն մեր մտքի, սրտի, հոգու անդաստաններում, մենք ևս պետք է ուշադիր լինենք, որ վաճառատան չվերածենք մեր հոգին, այլ թույլ տանք, որ Աստված գա և բնակվի մեր մեջ. «Կենդանի Աստծու տաճար եք դուք, – ինչպես ասաց Աստված, – պիտի բնակվեմ նրանց մեջ ու պիտի ընթանամ նրանց միջով, և նրանց Աստվածը պիտի լինեմ, և նրանք պիտի լինեն իմ ժողովուրդը» (Կորնթացիներ Բ 6:16):

Սիրելինե՛ր, Սուրբ Մարիամ Աստվածածնից եկեք մենք ևս սովորենք կարևորել մեր կոչումն ու առաքելությունը այս կյանքում ու զգոն լինենք: Չլինենք Հուդայի նման, որ չցանկացավ լինել Քրիստոսի աշակերտներից, հավատարիմ մնալ Փրկչին և մատնեց Նրան փարիսեցիների ձեռքը: Պետրոս առաքյալը Հուդայի մասին ասում է. «Նա մեզ հետ մեր խմբի մեջ էր. և նրան էլ էր վիճակված այս սպասավորությունը» (Գործք 1:17), «Նրա պաշտոնը թող ուրիշն առնի» (Գործք 1:20): Եվ ընտրվեց Մատաթիան: «Եվ աղոթք անելով՝ ասացին. «Տե՛ր, Դու որ գիտես բոլորի սրտերը, ցո՛ւյց տուր այս երկուսից մեկին, որին ընտրեցիր, որպեսզի առնի վիճակն այն պաշտոնի և առաքելության, որից Հուդան ընկավ իր տեղը գնալու համար»: Եվ նրանց համար վիճակ գցեցին. վիճակը ելավ Մատաթիային, և սա դասվեց տասնմեկ առաքյալների հետ» (Գործք 1:24-26):

Սուրբ Կույս Մարիամ Աստվածածնից սովորենք աչալուրջ լինել, որպեսզի մեր շնորհները մեզանից չառնվեն ու տրվեն ուրիշներին: Հիշենք մեծ խնջույքի առակը (Ղուկաս 14:15-24), որը պատմեց մեր Տեր և Փրկիչ Հիսուս Քրիստոս, թե ինչպես մի մարդ իր ծառաներին ուղարկեց կանչելու խնջույքի հրավիրվածներին, սակայն նրանցից յուրաքանչյուրը մի պատճառաբանությամբ հրաժարվեց: Մեկը ամուսնացել էր, մյուսը ագարակ էր գնել, երրորդն էլ եզ էր գնել և գնում էր փորձարկելու: Տերը բարկանում է և հրամայում իր ծառային. «Իսկույն դո՛ւրս եկ քաղաքի հրապարակներն ու փողոցները և աղքատներին, խեղանդամներին, կաղերին ու կույրերին բեր մտցրո՛ւ այստեղ» (Ղուկաս 14:21): Ծառան գալիս զեկուցում է, որ դեռ էլի տեղ կա: Տերը ծառային ասում է. «Դո՛ւրս եկ ճանապարհներն ու ցանկապատների առաջ և մարդկանց այստեղ մտցրո՛ւ, որպեսզի տունս լցվի: Ասում եմ ձեզ, որ այդ հրավիրվածներից ոչ ոք իմ ընթրիքից չի ճաշակի» (Ղուկաս 14:23,24):

Սովորենք հավատարիմ լինել մեզ տրված փոքր բաների մեջ, որպեսզի Տերը մեզ արժանացնի Իր մեծագույն պարգևներին: Մնասների առակում Տերն ասում է. «Ազնիվ և բարի ծառա, քանի որ այդ փոքր բանի մեջ հավատարիմ եղար, իշխանություն ունեցիր տասը քաղաքների վրա» (Ղուկաս 19:17): Իսկ այն ծառայից, որ մնասը պահել էր և չէր աշխատեցրել, հրամայում է վերցնել և տալ արդեն իսկ տասը մնաս ունեցողին. «Ասում եմ ձեզ, թե՝ ով որ ունի, նրան պիտի տրվի, իսկ նրանից, որ չունի, պիտի վերցվի և այն, ինչ որ ունի» (Ղուկաս 19:26):

Այսպես՝ մենք, ի մտի ունենալով Աստծո պատգամները և պատվիրանները, հոգեշահ առակները, փորձենք լինել ճշմարիտ քրիստոնյաներ: Սուրբ Աստվածամոր և Հովհաննես Ավետարանչի նմանությամբ և հետևողությամբ մինչև վերջ հետևենք մեր Տիրոջը և հավատարիմ լինենք Նրան, ինչպես նաև անարձագանք չթողնենք Աստծո կանչը, բազմացնենք մեզ տրված շնորհներն ու տաղանդները, վերադարձնենք դրանք Աստծուն՝ ծառայեցնելով ուրիշներին:

Սիրելի՛ մայրեր և քույրեր, սրտանց շնորհավորում ենք բոլորին այս տոնի կապակցությամբ և մեր աղոթքն ենք բարձրացնում յուրաքանչյուրիդ համար, որպեսզի Սուրբ Կույսի բարեխոսությամբ կարողանաք իսկապես հավատարիմ լինել ձեր կոչման և առաքելության մեջ, քանի որ ձեզանից է կախված քրիստոնյա ճշմարտամիտ, բարեսիրտ զավակների դաստիարակությունը: Սուրբ Աստվածամոր բարեխոսությունն ենք հայցում բոլորիդ համար, որպեսզի Նա մշտապես իր հոգատար և կարեկից աղոթքներով աջակից լինի ձեզ ամեն օր ու ամեն պահ, Նրա անձի ոգեշնչմամբ թող զորանան ուժակորույս և հուսակտուր կանայք և մայրերը: Նրա աղոթքներով թող ընդունվեն բոլոր ընծաներն ու նվիրաբերությունները, թող ուժ ստանան հոգնաբեկ սրտերը:

Շնորհք, սէր և խաղաղութիւն Տեառն մերոյ Յիսուսի Քրիստոսի եղիցի ընդ ձեզ, ընդ ամենեսեանսն. Ամեն:

 

Տեր Վահան քհն. Առաքելյան

07.04.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․