«Աստվածային ուրախությունը գալիս է տալով»

Դեկտեմբերի 29-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Հարությունյան Ռուզաննային (41տ.) հանձնեց դրամական օգնություն (100 ԱՄՆ դոլար), որ տրամադրել էր համայնքի անդամ Սուսաննա Մարտիրոսյանը: Հարությունյան բազմազավակ ընտանիքը վարձակալությամբ բնակվում է Արարատի մարզի, Եղեգնավան գյուղի 4-րդ տ. հասցեում: Վեց զավակների հայրը, աշխատանք չունենալու պատճառով, մեկնել է Ռուսաստանի Դաշնություն՝ արտագնա աշխատանքի: Բայց արդեն երկու ամիս է ի վիճակի չէ աշխատելու. աշխատանքի ընթացքում տեղի ունեցած դժբախտ պատահարի պատճառով աչքերը վնասել է, վիրահատության է ենթարկվել, մի աչքի տեսողությունն այժմ 20 % է կազմում, իսկ մյուս աչքն ընդհանրապես չի տեսնում: Ընտանիքի մայրը՝ Ռուզաննան, իր զավակների հետ դժվար կացության մեջ է հայտնվել. երբեմն, որևէ մեկի տանն աշխատանք լինելու դեպքում, իր երեքամյա փոքրիկի խնամքը թողնում է աղջիկներին, որպեսզի տղաների հետ աշխատանքի գնա: «Ավագ որդիներս սովորում են Վարդաշենի թիվ 1 գիշերօթիկ դպրոցում: Նրանք հաճախակի բացակայում են դասերից, որպեսզի ինձ օգնեն աշխատանքի մեջ: Հունվար ամսից մեզ ընտանեկան նպաստ կտրամադրեն, որն ինչ-որ չափով կօգնի լուծելու մեր խնդիրները: Շնորհակալ եմ աջակից անձին, որ օգնության ձեռք մեկնեց իմ ընտանիքին»,- ասաց Ռուզաննան:

Հոգևոր ուրախությունն Աստծո համար հաճելի է և ցանկալի: Աստվածաշունչը լի է ուրախությամբ ապրելու կոչերով. «Աստծո Արքայությունն ուտելիք կամ ըմպելիք չէ, այլ արդարություն, խաղաղություն և խնդություն՝ Ս. Հոգուց տրված»,- ասում է Պողոս առաքյալը (Հռոմ. 14:17): Ուրախ լինելու պատգամի մասին կարդում ենք. «Միշտ ուրա՛խ եղեք Տիրոջով, նորից ասում եմ՝ ուրա՛խ եղեք» (Փիլիպ. 4:4):

«Սերն ինքնին գոյություն է, իսկ ուրախությունը բխում է Սիրուց: Մեկը մի իր է վերցնում, որն իրեն նվիրել են, և ուրախանում է այդ իրով: Մյուսն ամեն ինչ է տալիս և ուրախանում ամեն ինչի համար: Այն ուրախությունը, որը մարդ զգում է, երբ վերցնում է, մարդկային ուրախություն է: Իսկ այն ուրախությունը, որը մարդ զգում է, երբ տալիս է, աստվածային ուրախություն է: Աստվածային ուրախությունը գալիս է տալով»,- ասել է Հայր Պաիսիոս Աթոսացին:

Կարինե Սուգիկյան