Այց վիրավոր զինվորի ընտանիք

Հունիսի 15-ին Զորավոր Սբ. Աստվածածին եկեղեցու համայնքը, հոգևոր հովիվ Տեր Գրիգոր քահանա Գրիգորյանի գլխավորությամբ, այցելեց Արցախյան քառօրյա պատերազմի ժամանակ վիրավորված ժամկետային զինծառայող Սարգսյանի Էդգարի ընտանիք: 19-ամյա Էդգարն արդեն վերադարձել էր զինծառայության՝ ուսի և պարանոցի շրջանում վնասվածքների հետ կապված համապատասխան բուժումներն ստանալուց հետո: Էդգարն իր զինվորական ծառայությունն անցկացնում է ԼՂՀ պաշտպանական բանակում՝ Ջաբրաիլ զորամասում և պատերազմական օրերին լրացել էր նրա զինծառայության իններորդ ամիսը:

Էդգարի հայրը՝ Սարգսյան Ադամը, պատմեց, որ թշնամու կողմից սրտին ուղղված փամփուշտի մահացու հարվածից իր տղային փրկել է Աստված՝ այն փայտե խաչի շնորհիվ, որ Էդգարը կրել է իր պարանոցին, և թշնամու գնդակը դրան դիպչելով՝ ամբողջովին փշրել էր այն: Ապա նա ցույց տվեց այն շնորհակալագիրը, որին արժանացել է Էդգարը Երևանի քաղաքապետ Տարոն Մարգարյանի կողմից:

Սարգսյանների վեց հոգուց բաղկացած ընտանիքը վարձակալությամբ է ապրում Ջանիբեկյան 36 հասցեում: Սարգսյան Ադամն առողջական խնդիրների պատճառով ի վիճակի չէ աշխատելու, մյուս որդին և կինն էլ փորձում են աշխատանք գտնել:

Տեր Գրիգորը բժշկության աղոթք կարդաց և ընտանիքին հանձնեց դրամական օգնություն: Զինվորի հայրն անչափ շնորհակալ էր այն ուշադրության համար, որ ցուցաբերեց Զորավոր Սբ. Աստվածածին եկեղեցու համայնքն իր ընտանիքի հանդեպ և նշեց, որ այժմ հնարավորություն կունենա այցելելու իր որդուն, ով կրկին անգամ բուժում է ստանում Ջաբրաիլի հոսպիտալում՝ ուսի շրջանում ստացած վնասվածքի նոր բարդությունների պատճառով:

Համայնքի այցը նպատակ ուներ իր երախտագիտությունը հայտնել Սարգսյան ընտանիքին՝ հայրենասեր և խիզախ զավակ դաստիարակելու համար:

«Շնորհակալ ենք և երախտապարտ, որ նման զավակ ունեք, ով, անվեհերորեն շարունակելով հայրենանվեր առաքելությունը, բարձր է պահում հայոց ազգի արժանապատվությունը»,- ասաց Տեր Գրիգորը զինվորի հորը:

Կարինե Սուգիկյան