Գրքեր

Այցելություն «Մարի Իզմիրլյանի» անվան մանկատուն

Ծաղկազարդի տոնին՝ մանուկների օրհնությանն ընդառաջ, մարտի 22-ին Զորավոր Սուրբ Աստվածածին եկեղեցու «Զորավոր» երիտասարդաց միությունը եկեղեցու հոգևոր հովիվ Տեր Գրիգոր քահանա Գրիգորյանի և երիտասարդաց միության հոգևոր պատասխանատու Տեր Զգոն քահանա Աբրահամյանի հետ միասին այցելեցին «Մարի Իզմիրլյանի» անվան մանկատուն:

Զորավոր Սուրբ Աստվածածին եկեղեցու համայնքի և երիտասարդաց միության ջանքերով միրգ, քաղցրավենիք և հիգիենիկ պարագաներ ստացան մանկատան երեխաները:

Հերթական այցը մեծ ուրախություն էր պատճառել երեխաներին: Տեր Գրիգորը մանկատան տնօրինությանը, մանկավարժներին և երեխաներին փոխանցեց Արարատյան Հայրապետական թեմի առաջնորդական փոխանորդ գերաշնորհ Տեր Նավասարդ արքեպիսկոպոս Կճոյանի օրհնությունն ու գնահատանքը: Սրբազան Հոր կողմից երեխաներն անակնկալ ունեին. «Մանուլիկ»-ն ու «Միկի» մկնիկն էին եկել: Նրանք իրենց խաղերով, պարերով աշխուժություն, զվարթություն և ժպիտ պարգևեցին երեխաներին: Երիտասարդաց միության անդամները, միանալով հերոսներին, երեխաների հետ պարում էին, մասնակցում խաղերին: 15-ամյա կույր Մարիամը իր հրաշալի ձայնով հիացրեց ներկաներին: Խաղ ու պարից հետո «Մանուլիկ»-ն ու «Միկի» մկնիկը վստահ էին, որ իրենք նորից են այցելելու հրաշք մանուկներին: Տեր Հայրերը, առանձին խմբերի բաժանվելով, բժշկության աղոթքներ կարդացին մյուս սենյակներում գտնվող այն երեխաների համար, ովքեր առողջական խնդիների պատճառով դահլիճում չէին:

Վերջում Տեր Գրիգորը «Պահպանիչ» աղոթք կատարեց, ջերմության և սիրո մթնոլորտում դժվար էր թե՛ երեխաներին, և թե՛ երիտասարդներին միմյանց հրաժեշտ տալը: Բայց և այնպես նրանք միմյանց հրաժեշտ տվեցին նորից հանդիպելու ակնկալիքով:

Հակոբոս առաքյալը սուրբ և անարատ բարեպաշտությունը Հայր Աստծո առաջ համարում է որբերին և այրիներին այցելելը իրենց նեղության մեջ (Հակոբոս 1:27):

Աստծուն սիրելու ճանապարհը անցնում է մարդուն սիրելու ճանապարհով:

Աստծո սերը մարդկանց դարձրել է Աստծո որդիներ, և Իր որդիներին Հայրը մշտապես պատգամում է՝ սիրե՛ք միմյանց: Սիրո առաքյալ Հովհաննեսն ասում է. «Խոսքերով և լեզվով չսիրենք, այլ՝ գործով և ճշմարտությամբ: Եվ հենց դրանով ճանաչած կլինենք, որ ճշմարտությունից ենք, և Աստծո առաջ կանգնելու վստահություն կունենան մեր սրտերը» (Ա Հովհաննես 3:18-19):

«Սերն ու կարեկցանքը օգնում է և՛ կարիքի մեջ գտնվողին, և՛ նաև նրան, ով այն տալիս է իր ամբողջ սրտով: Լինել կարեկից նշանակում է ամեն մարդու մեջ տեսնել Աստծուն: Կարեկցանքը մարդկանց միավորող ահռելի մի ուժ է: Միայն կարեկցանքը կարող է անկեղծ հիանալ յուրաքանչյուր մարդ էակով միայն նրա համար, որ նա Արարչի ձեռքի գործն է: Մարդը ոչ այդքան հացի, որքան սիրո և կարեկցանքի կարիք ունի» (Մայր Թերեզա):

 

Կարինե Սուգիկյան

22.03.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․