Ճշմարիտ հոգևոր ուղին

Մայիսի 30-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Կիրակոսյան Սոնիկին (74 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Տիգրան Մակարյանը: Տիկին Սոնիկն իր թոռնուհու՝ Դաունի համախտանիշ ունեցող Կիրակոսյան Հեղինեի (16 տ.) հետ բնակվում է Արմավիրի մարզի Մեծամոր քաղաքի հանրակացարանի 24/4 հասցեում:

«Հեղինեին բարուրից ես եմ պահել ու մեծացրել, քանի որ աղջիկս՝ Հեղինեի մայրը, առողջական խնդիրներ ունի, իսկ Հեղինեի հայրը չընդունեց նրան, նրա ծնունդից երկու տարի անց նա լքեց ընտանիքը: Այժմ աղջիկս իր տղայի ընտանիքի հետ վարձակալությամբ բնակվում է Էջմիածին ք. Նարեկացի 26 հասցեում»,-ասաց տիկին Սոնիկը՝ հավելելով, որ իրենք էլ Մեծամորից ճարահատյալ տեղափոխվեցին էջմիածին, քանի որ հանրակացարանի տանիքի անսարքության և անձրևաջրերի կաթոցների պատճառով այլևս հնարավոր չէր այնտեղ ապրել: Մեծամորից էջմիածին տեղափոխվելու պատճառով տիկին Սոնիկին այլևս ընտանեկան նպաստ չեն տրամադրում, նա միայն Հեղինեի հաշմանդամության և իր ծերության թոշակների գումարներն է ստանում:

«Եթե հնարավորություն լիներ իմ բնակարանի տանիքը վերանորոգելու,- ասաց տիկին Սոնիկը,-ապա Հեղինեի հետ կտեղափոխվեի այնտեղ և ընտանեկան նպաստի ու թոշակների գումարներով քիչ թե շատ կկարողանայի հոգալ մեր կարիքները՝ առանց թոռնիկիս նեղություն պատճառելու»:

Հեղինեն սովորում է Զվարթնոցի թիվ 2 հատուկ օժանդակ գիշերօթիկ դպրոցում: Ոչ միայն տիկին Սոնիկի, այլ նաև դպրոցի ուրախությունն է կենսուրախ Հեղինեն, ում առօրյան, ըստ տատիկի պատմածի, հնարավոր չէ պատկերացնել առանց երգ ու պարի, առանց նկարչության, տատ ու թոռնուհի սիրում են հաճախակի եկեղեցի այցելել, Հեղինեն օգնում է տատիկին տան մաքրության մեջ, միասին ճաշ են պատրաստում:

Տիկին Սոնիկն իր երախտագիտությունը հայտնեց Տեր Գրիգորին և աջակից անձին՝ ուրախություն ապրելով, որ Տեր Հոր միջնորդությամբ՝ «Արև-երեխաներ» երեխաների առողջության և զարգացման կենտրոնն այսուհետ կլուծի Հեղինեի բուժհետազոտության և բուժման հետ կապված խնդիրները:

Հայր Պաիսիոս Աթոսացին ասում է, որ ողորմության մասին պետք է այսպես մտածել՝ եթե աղքատի փոխարեն լիներ Ինքը՝ Քրիստոս, ի՞նչ կտայի ես Նրան, անկասկած՝ ամենալավը. «Այդպես մարդը հասկանում է, որն է իրական սերը: Բարին այն դեպքում է բարի, երբ այն գործողը զոհաբերում է իրենից ինչ-որ մի բան՝ կլինի դա քունը, հանգիստը կամ այլ բան: Ճշմարիտ հոգևոր ուղին այսպիսին է՝ մոռանալ քո կողմից գործված բարին և հիշել միայն այն բարիքը, որ ուրիշն է քո հանդեպ գործել»:

Կարինե Սուգիկյան