Ճշմարիտ Լույսին հետևողը պտղաբեր կյանք է ունենում

Հավատքը քրիստոնյայի համար այն մեծագույն ուժն է, որը զորացնում ու գոտեպնդում է նրան, օգնում է հաղթահարել բոլոր այն պատնեշները, որ հանդիպում են նրա ճանապարհին: Հավատքով սպառազինված քրիստոնյան հավատարիմ է իր կոչմանն ու առաքելությանը, նա այլևս խավարի տիրապետության տակ չէ, այլ լույսի որդի է և Աստծու գործակիցը, քանի որ ունի կյանքի ճշմարիտ Առաջնորդ, Ով ասաց. «Ես եմ ճանապարհը, ճշմարտությունը և կյանքը: Ինձնով միայն կարելի է գնալ Հոր մոտ» (Հովհ. 14:5-6), «Ես աշխարհ եկա որպես լույս, որպեսզի ով որ Ինձ հավատա, խավարում չմնա» (Հովհ. 12:46):  

Ճշմարիտ Լույսին հետևողը լուսավոր և գործուն հավատ ունի, որի արդյունքը պտղաբեր կյանքն է: Մայիսի 18-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը, որպես սիրո և երախտագիտության արտահայտություն, Ստեփանյան Գագիկին (37 տ.) փոխանցեց 100 000 դրամ, որ տրամադրել էր Զորավոր Ս. Աստվածածին եկեղեցու համայնքի անդամ Պետրոսյան Հրաչը: Գագիկը՝ որպես պայմանագրային զինծառայող, մասնակցել է արցախյան վերջին պատերազմին և հոկտեմբերի 13-ին Ջրականում ոտքի բեկորային վնասվածք ստացել: Նա իր կնոջ և երկու զավակների հետ  բնակվում է Վայոց Ձորի մարզի Մալիշկա գյուղի 18 փ., 10 տ․ հասցեում: Զինծառայողի բուժումն ամբողջովին չի իրականացվել, ինչի հետևանքով նա այժմ տեղաշարժվում է հենակով և ի վիճակի չէ աշխատելու: Գագիկի ընտանիքին ժամանակ առ ժամանակ օգնում են հարազատները: Զինծառայողի ընտանիքն իր երախտագիտությունը հայտնեց Տեր Գրիգորին և աջակից անձին:

Կարինե Սուգիկյան