Գրքեր

«Ճշմարիտ սերը վկայվում է գործով և ճշմարտությամբ»

Դեկտեմբերի 29-ին Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և հոգևոր հովիվ Տեր Գրիգոր քահանա Գրիգորյանի գլխավորությամբ, այցելեց Գալստյան ընտանիքին, որ բնակվում է Աջափնյակ 15-րդ թաղամասի Մազմանյան 5/45 հասցեում: Ընտանիքը սոցիալապես անապահով վիճակում է հայտնվել, քանի որ ոչ ոք չի աշխատում: Ընտանիքի հայրը՝ 41-ամյա Գեղամ Գալստյանը, շինարար է, բայց առողջական խնդրի պատճառով ի վիճակի չէ աշխատելու: Նա նշեց, որ փնտրում է հսկիչի աշխատանք, որպեսզի կարողանա քիչ թե շատ հոգալ ընտանիքի կարիքները: Քառանդամ ընտանիքը շուտով կհամալրվի ևս մեկ անդամով: Ընտանիքի մայրը՝ Արմինե Թադևոսյանը (35 տ.), նշեց, որ հղիության ընթացքում իր մոտ բարդություններ են առաջ եկել, և նա ժամանակ առ ժամանակ ստացիոնար բուժում է ստանում: «Ամուսինս մեկ տարուց ավել է, ինչ սրտի հետ կապված առողջական լուրջ խնդիր ունի: Նա երկրորդ խմբի հաշմանդամ է և իր հաշմանդամության գումարով կարողանում ենք մասամբ գնել իր համար անհրաժեշտ դեղորայքը: Ըստ բուժստուգումների՝ նա սրտի փոխպատվաստման խնդիր ունի, որն այստեղ չի արվում, այլ միայն արտասահմանում, իսկ մեր ընտանիքն այդ վիրահատության հնարավորությունը չունի»,- ասաց Արմինեն:

Տեր Գրիգորը բժշկության աղոթք կարդաց և ընտանիքին հանձնեց Հայ Առաքելական Սուրբ եկեղեցու Հյուսիսային Ամերիկայի Արևմտյան թեմի Սրբոց Ղևոնդյանց Մայր տաճարի «Բարի սամարացիներ» խմբի աջակցությամբ գնված ամանորյա անհրաժեշտ սնունդ: Տեր Հայրը Նավասարդ Սրբազանի անունից ընտանիքին փոխանցեց Ամանորյա և Ս. Ծննդյան շնորհավորանքներ, իսկ ընտանիքի փոքրիկներին՝ Արաքսյային (7 տ.) և Վոլոդյային (6 տ.), հանձնեց մանկական Աստվածաշնչեր:

«Յուրաքանչյուր ոք իր կյանքում առիթ է ունենում այս հարցադրումն իրեն ուղղելու՝ ինչո՞ւ եմ ապրում: Հարց, որին իր ողջ խորությամբ անդրադառնում է աստվածահիմն կրոնը՝ քրիստոնեությունը, պատասխանելով՝ կյանքդ կարժևորվի, երբ այն ապրես Աստծո համար: Աստծով և Աստծո համար ապրել, նշանակում է Աստծուն նմանվել, իսկ Աստված խոսքի Աստված չէ, այլ՝ գործի: Ճշմարիտ քրիստոնյա լինելը, Քրիստոսի ներկայությունը մեր մեջ պահպանելն ամենօրյա աշխատանք է պահանջում: Այդ պատճառով է Ս. Հովհաննես առաքյալն ասել. «Որդյակնե՛ր, մեր սերը թող չլինի միայն խոսքով ու լեզվով, այլ գործով արտահայտված ճշմարիտ սեր» (Ա Հովհաննես 3:18): Ճշմարիտ սերը վկայվում է գործով և ճշմարտությամբ: Այն հոգին է մխիթարվում, ով սիրում է և զոհաբերում իրեն հանուն իր մերձավորների: Այդպիսի հոգում է բնակվում աստվածային բարությունը, արդարությունը և կատարելությունը»,- ասաց Տեր Գրիգորը:

 

 

Կարինե Սուգիկյան

29.12.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․