23 Նոյեմբեր, Եշ, Հիսնակաց պահքի Դ օր

Գրքեր

Դարձի՛ր պահապան

«Բարև Ձեզ, ցանկանո՞ւմ եք դառնալ Տավուշի սահմանամերձ գյուղերի երեխաների պահապանը։ Եթե այո, ապա մասնակցեք «Խաղաթաքստոց» բարեգործական միջոցառմանը, տեղադրեք փազլի Ձեր կտորը ու աջակցեք ևս մեկ թաքստոցի կառուցման աշխատանքներին», - Երևանի մի շարք եկեղեցիների բակերում առաջարկում էին երիտասարդները։ 
Հոկտեմբերի 8-ին Արարատյան Հայրապետական թեմի առաջնորդական փոխանորդ Տ. Նավասարդ արքեպիսկոպոս Կճոյանի օրհնությամբ Երևանի 8 եկեղեցիների բակերում մարդիկ կարողացան մասնակից դառնալ «Խաղաթաքստոց» բարեգործական միջոցառմանը և իրենց կտոր սերը նվիրել Տավուշի սահմանամերձ գյուղերի երեխաներին։ Նրանք հնարավորություն ունեցան դառնալ մեկ ընդհանուր գաղափարի՝ փազլի մի կտորը։

«Պահապան» հիմնադրամի նախաձեռնած «Խաղաթաքստոց» ծրագիրը ենթադրում է յուրաքանչյուրիս մասնակցությունը Տավուշում մանկական թաքստոցների կառուցման գործին, որին մեծ ոգևորությամբ միացան նաև ԱՀԹ երիտասարդները։

Հազար, հինգ հազար, երկու հարյուր…գումարները տարբեր էին, իսկ կարևոր գործում իրենց լուման ունենալ ցանկացողները՝ շատ: Ս. Պատարագից դուրս եկող հավատացյալները և ուղղակի անցորդները անտարբեր չէին անցնում փազլի կողքով, անգամ եթե գումար չէին թողնում: Մարդկանց ներգրավվածության ակտիվությունը գերազանցել էր անգամ ակցիան անցկացնող երիտասարդների սպասելիքները: Հարյուրավոր մարդիկ միացան նախաձեռնությանը՝ ցույց տալով, որ անտարբեր չեն և կիսում են իրենց սերը: 
Տավուշի սահմանամերձ գյուղերում մոտ 10,000 երեխա ապրում է պարբերական կրակոցների տակ։ Նրանց անվտանգությունն ապահովելու նպատակով «Պահապան» հիմնադրամը նպատակ ունի կառուցել 15 խաղաթաքստոց 15 գյուղերի դպրոցներում և մանկապարտեզներում, որոնք կահավորվելու են որպես խաղասենյակ:

Մասնակցել «խաղաթաքստոց»-ին՝ նշանակում է դառնալ հարյուրավոր երեխաների պահապան։ Մասնակցել «խաղաթաքստոց»-ին՝ նշանակում է հատիկ-հատիկ կառուցել սահմանամերձ գյուղերի երեխաների ապահով ապագան։ 

Դարձի՛ր պահապան, օգնի՛ր հավաքել Տավուշի սահմանամերձ գյուղերի երեխաների անվտանգության փազլը։



Հասմիկ Թամամյան
Արարատյան Հայրապետական թեմի տեղեկատվական բաժին

08.10.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․