Դատելու մասին

Ժայռաբնակ աբբա Հովհաննես ծերը աբբա Դանիել Եգիպտացու մասին պատմեց, թե նա մի անգամ գնաց Տերենութ, որպեսզի վաճառի իր ձեռագործը: Մի երիտասարդ աղաչեց նրան և ասաց. «Հանուն Աստծո, հա՛յր, ե՛կ իմ տուն և իմ կնոջ վրա աղո՛թք արա, որովհետև ամուլ է»: Եվ ծերը, երիտասարդի թախանձանքներին տեղի տալով, գնաց նրա տուն, աղոթք արեց նրա կնոջ վրա, և նա Աստծո կամքով հղիացավ: Մարդկանցից ոմանք, որ չէին երկնչում Աստծուց, անզգամաբար հանդգնում էին ասել, թե այն երիտասարդը անմասնակից էր, իսկ կինը աբբա Դանիելից հղիացավ: Ծերն ասաց ամուսնուն. «Երբ քո կինը երեխա կծնի, ինձ տեղեկացրո՛ւ»: Եվ ամուսինը, գալով նրա մոտ, ասաց. «Աստծով և քո աղոթքների շնորհիվ իմ կինը ծննդաբերեց, հա՛յր»: Այնժամ եկավ հայր Դանիելը և երիտասարդին ասաց. «Ճաշկերո՛ւյթ պատրաստիր և հրավիրի՛ր քո բարեկամներին ու հարազատներին»: Եվ երբ հավաքված ճաշում էին, վերցրեց ծերը երեխային ամենքի առաջ և նրան հարցրեց. «Ո՞վ է քո հայրը»: Ծծկերը ձեռքի մատով ցույց տվեց իր հորը: Այդ երեխան դեռ քսաներկու օրական էր: Եվ ամենքը փառավորեցին Աստծուն, որ պահպանում է նրանց, ովքեր ճշմարտությունն են փնտրում իրենց բովանդակ սրտով:

«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016