Երբ իրականություն է դառնում «Սիրիր քո ընկերոջը քո անձի պես» պատվիրանը

ԱՀԹ առաջնորդական փոխանորդ գերաշնորհ Տեր Նավասարդ արք. Կճոյանի օրհնությամբ Զորավոր Սբ. Աստվածածին եկեղեցու համայնքը հոգևոր հովիվ Տեր Գրիգոր քահանա Գրիգորյանի գլխավորությամբ ակտիվ գործունեություն է ծավալում սոցիալական ծրագրերի շրջանակներում՝ թիրախ-խումբ ընտրելով մանկատան սաներին, ծերերին, զինվորներին և անապահով ընտանիքներին:

Այս անգամ համայնքի երիտասարդ հավատացյալի կողմից շաքարավազ, ալյուր և մակարոնեղեն (ընդհանուր 900 կգ) բաշխվեց համայնքի անապահով ընտանիքներին:

Յուրաքանչյուր հավատացյալ իր հավատն արտահայտում և ամրապնդում է բարի գործով՝ հիմք ունենալով Հակոբոս առաքյալի հետևյալ խոսքերը. «Առանց գործերի հավատն անօգուտ է» (Հակոբոս 2:20): Քրիստոնյայի համար կատարելության տանող ուղին սկսվում է սիրո ճանապարհից: Դիմացինին իր անձի նման սիրողը չի փնտրում միայն իր շահը, այլ փորձում է հոգեպես և ֆիզիկապես օգտակար լինել Աստծո պատկերն ու նմանությունն ունեցողին:

Երանելի աբբա Դորոթեոսն ասում է, որ ուշադրություն մի դարձրու, թե որքան հեռու ես «Սիրիր քո ընկերոջը քո անձի պես» (Մատթեոս 22:39) պատվիրանն իրագործելուց և չլինի թե վախենալով ասես՝ ինչպե՞ս սիրեմ մերձավորին իմ անձի պես: Նա խորհուրդ է տալիս հեռու վանել նման մտքերը, որպեսզի բարեգործությունը գերազանցի անձի ուժերին և իրականություն դառնա: «Հուսա առ Աստված, ցույց տուր Նրան քո բարին գործելու ձգտումը և անմիջապես կտեսնես օգնությունը, որ Նա կտա քեզ բարին գործելու համար: Պատկերացրու երկու աստիճան, մեկը տանում է դեպի Երկինք, մյուսը հակառակը՝ դեպի կործանում, իսկ դու գտնվում ես երկրի վրա: Մի մտածիր և մի ասա, թե ինչպե՞ս կարող եմ երկինք հասնել, դժվար է, բայց Աստծո օգնությամբ հնարավոր, բայց և միևնույն ժամանակ զգուշացիր, որ ներքևում չհայտնվես: Չարիք մի՛ գործիր մերձավորիդ, մի՛ տխրեցրու նրան, մի՛ զրպատիր և աստճանաբար՝ սկսելով բարին գործել, մխիթարելով մերձավորիդ խոսքով և գործով, կտեսնես, թե ինչպես ես աստիճան առ աստիճան բարձրանում դեպի Երկինք՝ դեպի Աստված»,- ասում է երանելին:

Բարեգործության՝ գործնական սիրո մեջ, մարդն իրապես ապրում է՝ զգալով և արտահայտելով իր մեջ ի սկզբանե դրված աստվածային սերը: Սոցիալական ծառայությունը բովանդակում, արժևորում և իմաստավորում է հավատացյալ մարդու կյանքը, իսկ Հայ եկեղեցին այդ ծառայության պահպանողն է և գործադրողը:

Կարինե Սուգիկյան