Գրքեր

Երեխաների պահքը

- Հա՛յր, հինգ-վեց տարեկան երեխաները պե՞տք է արդյոք ծոմ պահեն Սուրբ Հաղորդությունից առաջ:

- Գոնե Հաղորդություն ստանալու նախորդ օրը երեկոյան նրանք պետք է ձեթով պատրաստված պահոց կերակուր ուտեն: Սակայն այդ հարցը հոգևոր հոր իրավասության ներքո է: Ավելի լավ է, եթե մայրը հոգևոր հորը հարցնի, թե իր երեխան ինչպես պահք պահի, որովհետև փոքրիկի մոտ կարող են առողջության հետ կապված խնդիրներ լինել և օրինակ՝ նա պետք է կաթ խմի:

- Հա՛յր, իսկ որքա՞ն ժամանակ պետք է փոքրիկ երեխան պահք պահի:

- Եթե երեխան ամրակազմ է, առողջ, ապա կարող է պահք պահել: Դրանից բացի, այժմ բազմապիսի պահոց կերակուրներ կան վաճառքում: Առաջ երեխաները պահք էին պահում և ողջ օրը խաղում էին, վազվզում: Ֆարասում, Մեծ Պահքի ժամանակ, թե՛ մեծերը, և թե՛ փոքրերը ծոմ էին պահում մինչև ժամը իննը*: Ծնողները երեխաներին ամրոցում էին հավաքում, խաղալիքներ էին տալիս նրանց, որպեսզի խաղան, իսկ ցերեկվա ժամը երեքին, երբ եկեղեցու զանգերը կանչում էին Պատարագի, գնում էին եկեղեցի ու Հաղորդություն ստանում: Սուրբ Արսեն Կապադովկիացին ասում էր. «Երեխաներն ուտելու մասին չեն էլ հիշում, եթե ողջ օրը խաղում են: Արդ, մի՞թե հիմա պահքին չեն դիմանա, երբ նրանց Քրիստոսն է օգնում այդ հարցում»:

Տեսնելով, թե ինչպես են երեխաները պահք պահում՝ խիղճն սկսում է տանջել այն մեծահասակներին, ովքեր պահք չեն պահում: Հիշում եմ, ես փոքր էի ու իմ վարպետի հետ մի տանն էի աշխատում: Այնտեղ էլ մենք ճաշում էինք: Չորեքշաբթի և ուրբաթ օրերին ես հեռանում էի, չէի մնում ճաշին և մեր տուն էի գնում ճաշելու, որովհետև այդ մարդիկ պահք չէին պահում: Մի անգամ, հիշում եմ չորեքշաբթի օր էր, նրանք քաղցրաբլիթներ բերեցին և կամենում էին հյուրասիրել ինձ: «Շնորհակալություն,- ասացի նրանց,- բայց ես պահք եմ պահում»: «Մի տե՛ս է՜,- զարմացան նրանք,- այս փոքրիկը պահք է պահում, իսկ մենք՝ մեծահասակ քեռիներս ամեն ինչ ուտում ենք»:

 

* Այսինքն, մինչև ցերեկվա ժամը երեքը՝ բյուզանդական ժամանակով ժամը իննը, նրանք ոչինչ չէին ուտում և խմում:

 

Պաիսիոս Աթոսացու «Ընտանեկան կյանք» գրքից

Ռուսերենից թարգմանությունը՝ Էմիլիա Ապիցարյանի

 

19.06.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․