Գերագույն հոգևոր խորհուրդը և եպիսկոպոսաց դասը հանդիպում ունեցան Հայաստանի Հանրապետության նախագահի հետ | Geraguyn Hogevor Khorhurdy Ev Episkoposac Dasy Handipum Unecan Hayastani Hanrapetutyan Nakhagahi Het



Գրքեր

Գերագույն հոգևոր խորհուրդը և եպիսկոպոսաց դասը հանդիպում ունեցան Հայաստանի Հանրապետության նախագահի հետ

Մայիսի 30-ին, հրավերով Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, Հայաստանի Հանրապետության նախագահ Արմեն Սարգսյանը այցելեց Մայր Աթոռ Սուրբ Էջմիածին, ուր «Վաչե և Թամար Մանուկյան» մատենադարանում տեղի ունեցավ հանդիպում Գերագույն հոգևոր խորհրդի անդամների, հայաստանյան թեմերի առաջնորդների և Մայր Աթոռում պաշտոնավարող եպիսկոպոսների հետ:

Հանդիպումն սկսվեց միասնական Տերունական աղոթքով։ Ողջունելով և շնորհակալություն հայտնելով ՀՀ նախագահին հանդիպման առիթով՝ Ամենայն Հայոց Կաթողիկոսը նրան ներկայացրեց Գերագույն հոգևոր խորհրդի անդամներին և ԳՀԽ գործունեությունն ու եկեղեցական կյանքը կանոնակարգելու գործընթացում կարևոր առաքելությունը։

Վեհափառ Հայրապետն ընդգծեց, որ ՀՀ նախագահի անձը քաջածանոթ է ամենքին՝ Հայրենիքին տարբեր հանգամանքերում իր նվիրյալ ծառայությամբ, նաև որպես Հայոց Եկեղեցու հավատավոր զավակ և Մայր Աթոռ Ս. Էջմիածնի մեծ բարերար:

Նորին Սրբությունը ներկաների անունից գնահատանք հայտնեց նախագահ Սարգսյանին վերջին ներհայաստանյան զարգացումների ժամանակ ստանձնած ներգործուն դերակատարության և հոգևորականաց դասի հետ ունեցած համատեղ քննարկումների համար, որպեսզի գործընթացներն առաջնորդվեն խաղաղ կարգավորման և հանգուցալուծման։

Այնուհետև ԳՀԽ անդամներին խոսքով դիմեց ՀՀ նախագահ Արմեն Սարգսյանը՝ ուրախություն հայտնելով Գերագույն հոգևոր խորհրդի հետ հանդիպելու հնարավորության առիթով։ «Դուք համայնքներում ամեն օր հանդիպում եք մեր ժողովրդի ներկայացուցիչներին. լինի Արցախում, Հայաստանի հյուսիսում, հարավում, լինի Լոս Անջելեսում, Փարիզում, Մոսկվայում կամ այլուր: Հետևաբար, եկել եմ նաև ձեզանից լսելու, թե մեր ժողովուրդն ինչ է մտածում: Եկել եմ նաև ձեզ հետ երկխոսելու», - ասաց ՀՀ նախագահը։

ՀՀ նախագահն անդրադարձ կատարեց Հայ Եկեղեցու դերակատարությանը հայ ժողովրդի ոգու և հավատի, ընտանեկան արժեքների և առ հայրենին սիրո պահպանության գործում։ Տիար Արմեն Սարգսյանն արձանագրեց, որ Հայոց Եկեղեցին և հավատքը պետականության սյուներից են և ոչ միայն որպես ինստիտուտ, այլ նաև որպես մշակույթ՝ այն արժեքներով, որոնք Եկեղեցին դավանում է, որոնցով հարյուրավոր տարիներ պահվել է հայի ինքությունը, պահպանվել է մշակույթը, կրթվել հայ մանուկները։ Նախագահը նկատեց, որ այդ ամենի մեջ Եկեղեցու ներդրումը հսկայական է և արժեքը` աննկարագրելի։

Հանդիպմանը ՀՀ նախագահը պատասխանեց ԳՀԽ անդամների ու եպիսկոպոսաց դասի ներկայացուցիչների հարցերին, որոնք վերաբերում էին Հայրենիքի և հայ ժողովրդի առջև ծառացած մարտահրավերներին ու խնդիրներին, Հայաստան-Սփյուռք կապերին, ներհայաստանյան իրավիճակին:

30.05.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․