19 Նոյեմբեր, Բշ, Հիսնակաց պահքի Ա օր

Գրքեր

«Հացից վեր կա հոգու կյանքը»

Հայոց աշխարհի ամեն մի քարը, հողը, թուփը, լեռներն ու աղբյուրները, բերդերն ու ամրոցները, Հայոց երկնամերձ տաճարները զրուցում են անցորդի և ուխտավորի հետ, զրուցում և պատմում այն հերոսական անցյալի մասին, որ զարդարել է հայ ժողովրդի բազմադարյան ուղին: Շիրակ աշխարհի սառնորակ աղբյուրներով, պատմական կոթողներով և սրբավայրերով հարուստ Սառնաղբյուր գյուղն էլ շատ ասելիք ունի իր այցելուներին և ուխտավորներին: Սեպտեմբերի 2-ին Սառնաղբյուրի հարուստ պատմությանն ունկնդիր և հաղորդակից դարձան Զորավոր Ս. Աստվածածին եկեղեցու ուխտավորները՝ եկեղեցու հոգևոր հովիվ Տեր Գրիգոր քահանա Գրիգորյանի առաջնորդությամբ:

Ուխտավորները նախ հաղորդակից եղան գյուղի վաղ միջնադարյան խոնարհված սրբավայրի՝ Ս. Հակոբ եկեղեցու (4-5-րդ դ.) օրհնությանը, ուր և մասնակից եղան Ս. Պատարագին: Պատարագիչը՝ Տեր Գրիգորը, շնորհակալություն հայտնեց Շիրակի թեմի առաջնորդին՝ Միքայել Սրբազանին, ում օրհնությամբ իրեն արտոնվեց Ս. Պատարագ մատուցել Սառնաղբյուրի հնագույն սրբավայրում: Ս. Պատարագին քարոզխոսեց Շիրակի թեմի հոգևոր սպասավոր Տեր Ստեփանոս քահանա Ավետիսյանը, ով մինչ քարոզը ողջունեց ուխտավորներին, նրանց փոխանցեց թեմի առաջնորդի օրհնությունը, այնուհետև ներկայացրեց Սառնաղբյուրի սրբավայրերի պատմություններն ու ավանդությունները: Ապա անդրադառնալով օրվա ավետարանական ընթերցմանը՝ հացի բազմացման հրաշագործությանը, մասնավորապես շեշտեց, որ այսօր շատերը հրաշքի ակնկալիքով են ապրում, ինչի պատճառով թերանում են իրենց հավատքի մեջ՝ չնկատելով աստվածային փառքը և այն հրաշագործությունները, որ շրջապատում են մեզ ամենուր:

Ուխտավորները հաղորդակից եղան նաև գյուղի մյուս սրբավայրերի՝ Ս. Թադևոս եկեղեցու (1883 թ.), Ս. Ստեփանոս (Հոգեվանք-Կարմիր Վանք) (5-13-րդ դ.), Ս. Գրիգոր Լուսավորչի ուխտավայրի հարուստ պատմությանը, զորությանն ու օրհնությանը:

Սիրո ճաշից հետո ուխտավորներն ուղևորվեցին դեպի Հառիճավանք (7-13-րդ դ.), ուր նրանց դիմավորեց և օրհնության խոսք ասաց Արթիկի թեմի առաջնորդական տեղապահ Տ. Նարեկ վարդապետ Ավագյանը: Ուխտավորների խնդրանքի առանցքը Հայոց աշխարհի և Հայ եկեղեցու զորացման ու շենացման աղերսն էր առ Աստված: Ընդհանրական աղոթքից հետո Հայր Նարեկն ասաց, որ Աստծո հետ կենդանի հարաբերությամբ իրենց աղոթքները միախառնվեցին այն բազմադարյան աղոթքներին, որոնք հնչել են վանքի սուրբ կամարներից ներս:

«Ժողովուրդներն ապրում են, անշուշտ, հացով, բայց ոչ միայն հացով: Հացից վեր կա հոգու կյանքը, առանց որի մարդկային կյանք բացատրությունը դատարկ, անիմաստ խոսքեր պիտի լինեն: Հոգեկան կյանքի համար անհրաժեշտ է հոգևոր հայրենիք ունենալ, առանց որի մարդիկ չեն կարող ապրել որպես ազգ, այլ կապրեն պարզապես որպես իրարից անջատ, անհատ անձանց գումար: Հայ ժողովրդի համար հոգևոր ճշմարտությունների,

բարոյական սկզբունքների, ազգային առողջ գիտակցության, ներշնչարան-վառարան եղող «հոգևոր հայրենիք»-ը Հայաստանյայց եկեղեցին է. բազում անգամ ասված, բազում անգամ ասելի»,- ասել է երջանկահիշատակ Գարեգին Ա կաթողիկոսը:

Ամեն անգամ ուխտավորն ուխտի ճանապարհով հաղորդակցվում է իր ինքնության հարազատ աղբյուրին, հաղորդակցվում է և նորոգում այն աստվածային պատկերը, որ ունի իր մեջ: Ուխտավորները Երևան վերադարձան՝ հոգեպես հարստացած և զորացած:

 

 

Կարինե Սուգիկյան

02.09.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․