Գրքեր

Հայացք աշխարհին

Մի անգամ երեխաները հավաքվեցին բակում և սկսեցին իրենց մանկական գործերը քննարկել:

- Ես անչափ ուրախ եմ,- ասաց մի աղջնակ,- ինձ նոր ժապավեն են նվիրել, տեսեք, թե ի՜նչ փայլուն է:

Եվ ցույց տվեց իր մազերի մեջ հյուսված ժապավենը:

- Ես էլ ուրախության առիթ ունեմ,- ասաց մեկ այլ աղջնակ,- ինձ համար մի ամբողջ տուփ գունավոր մատիտներ են գնել:

- Պա՜հ, այդ ի՞նչ ուրախություն է,- ասաց մի տղա,- ես ահա՜ կարթ ունեմ, որքան ուզեմ կարող եմ ձուկ որսալ:

- Իսկ ես կապույտ վերնաշապիկ ունեմ,- պարծեցավ մյուս տղան և ձեռքերը տարածեց, որպեսզի բոլորը տեսնեն, թե ինչ գեղեցիկ վերնաշապիկ է:

Միայն մի տղա էր լուռ և ոչինչ չէր ասում:

- Նա ուրախանալու ոչ մի առիթ չունի, նույնիսկ ամենափոքր,- ասաց աղջնակներից մեկը,- այդ պատճառով էլ նստել և լռում է:

- Ո՜չ, ունեմ,- առարկեց տղան,- ես ծաղիկներ եմ տեսել:

- Ի՞նչ ծաղիկներ: Որտե՞ղ:

- Անտառում, երբ մոլորվեցի: Արդեն երեկո էր և շուրջբոլորը՝ մութ: Իսկ ծաղիկները սպիտակ էին և կարծես լույս էին արձակում:

Երեխաները ծիծաղեցին.

- Համա թե ուրախության առիթ ես գտել: Անտառը լի է ծաղիկներով:

- Իսկ մի անգամ ձմռանը տանիքներ եմ տեսել,- կրկին ասաց տղան:

Երեխաներն ավելի բարձր ծիծաղեցին:

- Այսինքն ամռանը տանիքներ չե՞ս տեսնում:

- Տեսնում եմ: Միայն թե ձմռանը տանիքները ձնածածկ էին և արևը շողշողում էր վերևում: Տանիքը մի կողմից կապույտ էր, իսկ մյուս կողմից՝ վարդագույն և փայլփլում էր:

- Բան ասացիր: Կարծես թե մենք ձմռանը տանիք չենք տեսել,- ասաց տղաներից մեկը:

- Ես արծաթափայլ ձկնիկներ էլ եմ տեսել,- շարունակեց տղան,- փոքրիկ լճակի մեջ: Անձրևից հետո այն երկնագույն էր և արևն էր փայլփլում դրա մեջ: Քամի էլ կար: Ջուրը թեթև ալեկոծվում էր և արծաթափայլ ձկնիկները խաղում էին դրանում:

- Համա թե շատախոսն ես,- ասաց աղջիկներից մեկը,- ոչ մի ուրախություն էլ չունես, այդ պատճառով էլ հորինում ես:

Եվ կրկին բոլորը ծիծաղեցին, բացի մի աղջկանից:

- Ծիծաղելի ոչինչ չկա,- ասաց նա,- այս տղան ուրախության շատ ավելի առիթներ ունի, քան մենք, որովհետև նա դրանք ամենուր է գտնում…

 

Երանի մենք էլ կարողանայինք ամեն օր փոքրիկ ուրախություններ գտնել մեր շուրջը:

 

 

Ռուսերենից թարգմանությունը՝ Էմիլիա Ապիցարյանի

05.10.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․