20 Մարտ, Դշ, Մեծ Պահքի ԺԷ օր

Գրքեր

Ինչպես էին անաստվածները ծաղրում Ավետարանը

60-ականների սկզբին խրուշչովյան հալածանքների ժամանակ Մոսկվայում որոշեցին հակաեկեղեցական ներկայացում բեմադրել: Բեմին գինու մառանի դեկորացիաներ պատրաստեցին: Ըստ սցենարի՝ այդ մառանում բազմաթիվ վանականներ, քահանաներ, անառակ կանայք և արատավոր այլ ժողովուրդ էր հավաքվել: Նրանք խմում էին, անկարգություններ անում և աստվածանարգ երգեր երգում: Բոլորը հռհռում էին և պարում այս ու այն կողմ նետված շշերի մեջ: Դրանք շատ էին, և նույնիսկ դեկորացիաները պսակող խաչն էր շշերից պատրաստված:

Ըստ սցենարի՝ այդ ամբոխի մեջ է գալիս «Քրիստոս»: Նա նայում է դիվոտած վանականներին և գոչում. «Հե՜յ դո՛ւք, լսե՛ք, հիմա ես կընթերցեմ «Երանի՜ հոգով աղքատներին, որովհետև նրանցն է երկնքի արքայությունը, երանի՜ սգավորներին…»,- և այդպես կարդում է երեք երանի: Սակայն, տեսնելով, որ ոչ ոք իր վրա ուշադրություն չի դարձնում, հորանջում է և Ավետարանը բարկացած հատակին նետում: «Միայն թե իմանայիք, թե այս ամենը որքա՜ն է ինձ ձանձրացրել: Հապա՛ մի մեծ գավաթ տվե՛ք ինձ»: Նրա համար տակառից գինի են լցնում: «Քրիստոս» մի շնչով դատարկում է գավաթն ու միանում համընդհանուր անզուսպ խրախճանքին…

Պրեմիերային հենց Գլխավոր քարտուղարին՝ Նիկիտա Խրուշչովին և բարձրաստիճան այլ հյուրերի էին սպասում: Երկրի ղեկավարի ցանկությամբ Քրիստոսի դերը պետք է մի երիտասարդ դերասան կատարեր, որը նրա սիրելին էր: Դերասանը, որ մյուսների պես անաստված էր, ուրախությամբ համաձայնեց Քրիստոսի դերը խաղալ: Այդ դերի համար կարող էր պետական մրցանակի արժանանալ: Որպեսզի ամեն ինչ ճշմարտանման լինի, նրա համար իրական Աստվածաշունչ գտան և սկսեցին փորձ անել:

Պրեմիերայի օրը բազմաթիվ պատասխանատու ընկերներ ու դիվանագիտական կորպուսի ներկայացուցիչներ եկան թատրոն՝ ներկայացումը դիտելու: Լեփլեցուն դահլիճ: Վարագույրը բարձրանում է և հանդիսատեսին է ներկայանում ծանոթ մառանը: Ահա՛ և վանականները անառակ կանանց հետ, ահա՛ տակառը և շշերից պատրաստված խաչը:

Խրախճանքն իր կիզակետում է: Հայտնվում է «Քրիստոս»: Կանգնում է հանդիսատեսի առջև, բացում Աստվածաշունչն ու սկսում երանիները կարդալ՝ ինչպես որ սցենարով էր նախատեսված: Կարդում է առաջին երանին, երկրորդը, հետո երրորդը, սակայն կանգ չի առնում և շարունակում է ընթերցել…

Սցենարի համաձայն՝ գիրքը վաղուց արդեն պիտի նետված լիներ հատակին, իսկ կարծեցյալ «Քրիստոս» միանար ընդհանուր զվարճանքին: Սակայն, անբացատրելի պատճառով, չի կարողանում ընթերցումն ընդհատել և հմայվածի պես պատվիրանները կարդում է մինչև վերջ: Հետո Մատթեոսի Ավետարանի հինգերորդ գլուխն է ամբողջությամբ կարդում, հետո վեցերորդը…

Հանդիսատեսը կռահում է, որ բեմի վրա ինչ-որ բան այն չէ: Դերասանները դադարեցրել են խեղկատակությունը: Բոլորը համակ ուշադրությամբ լսում են: Դերասանն ավարտում է Լեռան քարոզի ընթերցումը, խաչակնքվում շշերից պատրաստված խաչի առջև և «Հիշի՛ր ինձ, Տե՛ր, երբ գաս քո թագավորությամբ» ասելով՝ լացակումած հեռանում բեմից: Դահլիճում քար լռություն է:

Մեծ սկանդալ եղավ, սակայն կատարվածի մասին տեղեկությունները հայտնվեցին միայն արևմտյան մամուլում՝ շնորհիվ արգենտինացի լրագրողի, որը ներկա էր ներկայացմանը և ամեն ինչ սեփական աչքերով էր տեսել:

 «Չխաբվեք. Աստված չի ծաղրվում» (Գաղ. 6:7):

Տե՛ր, ողորմիր մեզ՝ մեղավորներիս:

 

 

Ռուսերենից թարգմանեց Էմիլիա Ապիցարյանը

 

29.11.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․