Մաղթանք շրջանավարտներին

Արարատյան Հայրապետական թեմի հավատացելոց անունից հղում ենք մեր բարեմաղթանքներն ու շնորհավորանքներն ուրախ և հուզումնալից «Վերջին զանգ»-ի առթիվ:

Ձեր առջև լայնորեն իր դռներն է բացել կյանքը, և դուք ինքնադրսևորման և արարման մեկնարկ եք վերցրել: Այլևս դուք առավել ազատ եք, և անհրաժեշտ է ճիշտ կողմնորոշվել տրված ազատության մեջ:

Դպրոցը ձեզ սպառազինել է գիտելիքներով, որոնք պիտի կենսավորեք ի շահ հայրենիքի, ինչն իրագործելի կդառնա միայն ազգի նկատմամբ պարտքի բարձրագույն գիտակցումով: Այդ գիտակցումը մարդուն տրվում է ի վերուստ և դառնում է կամովի հանձնառություն:

Վառ իդեալներից և գունագեղ տեսիլքներից պիտի ծնվեն ձեր նպատակները, ու սիրով ներշնչված ամեն մի գործ պիտի ծառայի ազգին ու հայրենիքին:

«Թող ձեր ամեն ինչը սիրով լինի», - պատվիրում է մեզ Ավետարանը (Ա Կորնթ. 16:14): Միայն այսպես առաջնորդվելով՝ կարելի է կյանքի կոչել դպրոցում ձեռք բերած գիտելիքները: Դուք կարող եք դրանք լրացնելով՝ նոր լիցք հաղորդել երկրի կյանքին:

Ասածի հաստատումը ոչ թե ձեր ավարտական վկայականները պիտի լինեն, այլ այն առաքելությունը, որին զինվորագրվում եք: Դուք գնում եք կյանքին նոր խոսք ասելու, նոր կորով հաղորդելու:

Դուք այն բարեբեր ծառն եք, որի պտղավորմանը սպասում ենք բոլորս:

Հարատև պտղաբեր եղեք, քանզի հաղթանակը հարատևության մեջ է: Մի՛ երկնչեք: Հավատարիմ մնացեք երիտասարդական ձեր երազներին և, անշուշտ, պիտի հարատևեք:

Սիրով և օրհնությամբ` ՆԱՎԱՍԱՐԴ ԱՐՔԵՊԻՍԿՈՊՈՍ ԿՃՈՅԱՆ
Առաջնորդական փոխանորդ Արարատյան Հայրապետական Թեմի

27.05.16