Գրքեր

Մարդիկ փոխել են խաղաղ բնությունը

Տեխնիկական միջոցների մեծ մասը, որ այսօր մարդիկ օգտագործում են իրենց հարմարության համար, աղմուկ են առաջացնում: Ա՜խ, իրենց աղմուկով մարդիկ խաղաղ բնությանը խենթացրել են, փոխել և կործանել են այդ ամբողջ տեխնիկայի միջոցով: Իսկ առաջ ի՜նչ լռություն էր: Մարդը, ինքն էլ չհասկանալով, և՛ ինքն է փոխվում և՛ փոխում է [շուրջբոլորն ամեն բան]:

Այսօր բոլորը սովորել են աղմուկի մեջ ապրել: Ժամանակակից երեխաներից շատերը սիրում են ընթերցել՝ միաժամանակ ռոք երաժշտություն լսելով: Այսինքն, նրանց ավելի շատ դուր է գալիս երաժշտության տակ ընթերցել, քան՝ լռության մեջ: Անհանգստությունից ավելի հանգիստ են, որովհետև անհանգստությունը նրանց ներսում է: Ամեն տեղ աղմուկ է: Ահա՛ լսիր… Անդադար այդ նույն «վու-ո՜ւ.. վու-ո՜ւ»-ն ես լսում: Փայտ են սղոցում՝ «վու-ո՜ւ…», հղկում են՝ «վու-ո՜ւ…», փոշեցիրով ցողում են ծառերը՝ կրկին «վու-ո՜ւ…»: Իսկ հետո ուրիշ փոշեցիրներ կհորինեն՝ ինքնաթիռների պես, որպեսզի ավելի շատ աղմկեն, հետո էլ կասեն. «Այս փոշեցիրներն ավելի լավն են, որովհետև ծառերը ոչ թե ներքևից են ցողում, այլ՝ վերևից, և ոչ մի բողբոջ առանց ցողվելու չի մնում»: Նման միջոցներ պիտի փնտրեն և ուրախանան դրանցով: Մարդը ուզում է ընդամենը մի մեխ մեխել և կրկին ինչ-որ «վու-ո՜ւ» անող բան է միացնում: Ինչո՞ւ: Որպեսզի ջուրը հավանգի մեջ ծեծի՞: Իսկ նա դեռ ուրախանում է, նույնիսկ՝ հպարտանում, զարմանալ կարելի է: Թարմ օդ ունենալու համար էլեկտրական հովհար են գնում և դրա գվվոցը լսում: Առաջ, երբ շոգ էր լինում, ձեռքով էին հով անում, իսկ այժմ սեփական ականջներն են հոգնեցնում մի քիչ թարմ օդի համար: Ծովում էլ են այժմ շատ աղմուկ ստեղծում: Ժամանակին առագաստային նավերն էին անաղմուկ լողում ծովի վրայով, իսկ այժմ նույնիսկ ամենափոքր նավակն է անտանելի աղմկում: Շուտով մարդկանց մեծամասնությունն ընդհանրապես ինքնաթիռներով է պտույտներ գործելու երկնքում: Եվ գիտե՞ս, թե կլինի դրանից հետո: Հողը գոնե ինչ-որ չափով կլանում է աղմուկը, իսկ երկնքում այնպիսի բան կկատարվի, որ Աստված հեռու պահի…

 

 

Հայր Պաիսիոս Աթոսացու «Ցավով և սիրով՝ ժամանակակից մարդու մասին» գրքից

Ռուսերենից թարգմանությունը՝ Էմիլիա Ապիցարյանի

 

19.01.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․