Մարդը ստեղծվել է երկրի վրա, բայց ոչ թե երկրի, այլ երկնքի համար

Բավական է, որ մի որոշ ժամանակով մարդիկ անցնեն սիզամարգով, ապա անմիջապես կնշմարվի առաջ եկած արահետը: «Ես Հորից ելա և եկա աշխարհ և այժմ թողնում եմ աշխարհը և գնում Իմ Հոր մոտ» (Հովհ. 16:28),- ասում է Քրիստոս: Աշխարհի Փրկիչը՝ Քրիստոս, աշխարհ գալով, Իր հետևորդների համար հարթեց փրկության ուղին: Այս ուղին քրիստոնյային հիշեցնում է, որ ինքը ստեղծվել է երկրի վրա, բայց ոչ թե երկրի, այլ երկնքի համար։ Փրկության ուղով հաստատուն ընթանալու համար քրիստոնյան հաճախակի աղոթքի ճանապարհներ է անցնում:

Օգոստոսի 6-ին Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, աղոթքի ճանապարհ անցավ՝ այցելելով Կոտայքի թեմի սրբավայրեր: Առաջին սրբավայրը, որ այցելեցին ուխտավորները, Գեղարդավանքն էր: Հայ եկեղեցու առաջին հայրապետի՝ սբ. Գրիգոր Լուսավորչի կողմից հիմնած վանքում ուխտավորները համախմբվեցին միասնական աղոթքի շուրջը՝ դիմելով օրվա հիշատակելի սրբերի՝ Եփեսոսի Սուրբ ժողովի երկու հարյուր հայրապետների բարեխոսությանը:

Աստծու հետ միավորման աղոթքի ուղին համայնքի անդամներին առաջնորդեց հաջորդ սրբավայրը՝ Գառնիի Ս. Աստվածածին եկեղեցի (12-րդ դար): Աղոթքի ուղին քրիստոնյայի համար հոգու խոր պահանջ է։ Հերթական սրբավայրն ուխտավորներին կրկին համախմբեց միասնական աղոթքի շուրջը՝ միասնական աղերս ընծայելով Տիրոջը՝ հանուն Հայաստան և Արցախ աշխարհների խաղաղության: Այնուհետև ուխտավորներն ուղևորվեցին Գառնիի «Մաշտոց Հայրապետ» եկեղեցի (12-13 դդ.), որն ըստ պահպանված արձանագրությունների՝ կոչվում է Ս. Աստվածածին, իսկ ավանդաբար «Մաշտոց Հայրապետ»՝ 897 թ. Գառնիում վախճանված հայոց կաթողիկոս Մաշտոց Եղիվարդեցու անունով (Մաշտոցի տապանաքարը Գառնիի հեթանոսական տաճարի մոտ գտնվող «Մաշտոց Հայրապետ» մատուռի ներսում է): Մաշտոց Եղիվարդեցի հայրապետն է կարգավորել և խմբագրել նախորդ հայրապետների կողմից տարբեր ժամանակներում ծիսական համակարգ ներմուծված կանոնները՝ ամփոփելով մեկ ժողովածուի մեջ, որը նրա անունով կոչվել է «Մաշտոց»: «Մաշտոց Հայրապետ» եկեղեցում ուխտավորները, Խաղաղական ժամերգությանը մասնակից դառնալով, ավարտեցին իրենց աղոթքի հերթական հոգեշահ ուղին, հոգեշահ, քանի որ այսօրվա արագընթաց և անհանգիստ ժամանակներում, երբ մարդու համար դժվար է թեկուզ մեկ օր ընտրել ուխտագնացության համար, ապա այդ ճանապարհն անցնողը հոգու մեծ շահ և օգուտ է ունենում:

Կարինե Սուգիկյան