13 Հուլիս, Բշ, Վարդավառի պահքի Ա օր

Գրքեր

Մեղքերի թողություն

Կեսօրին անապատում մոլորված մի եգիպտացի՝ հոգնած ու ծարավ, հասնում է մի մեծ վանական համալիրի, ուր վանականները պատրաստվում էին միջօրեի աղոթքին: Եգիպտացին հիանում է` տեսնելով մի վանականի, որը ջանադրաբար աղոթում էր, եռանդուն կերպով անդադար ծնկի իջնելով և բարձրանալով: Մոտենում է և խմելու ջուր խնդրում: Վանականի դեմքը խոժոռվում է ու զայրացած ասում է.

- Երեք օր է շարունակաբար աղոթում եմ և Աստծուց մեղքերի թողություն խնդրում, իսկ դու եկել ես ու սատանայի միջոցով ինձ աղոթքի՞ց ես ուզում կտրել:

Շփոթված եգիպտացին ներողություն է խնդրում և մտավախությամբ մոտենում մի այլ վանականի, որը ծնկի իջած նույնպես աղոթում էր ու կրկին խմելու ջուր խնդրում:

Այս վանականը դադարեցնում է աղոթքը, կանգնում, ուրախությամբ գնում և խմելու ջուր բերում:

Եգիպտացին հարցնում է.

- Իսկ այն եռանդուն աղոթող վանականի մոտ ո՞վ է կանգնած, որ նրան անընդհատ քաջալերում է անդադար աղոթել և ծնկի իջնել:

Այս վանականը ժպտում է և պատասխանում.

- Սատանան է, որ նրան այդպես եռանդուն քաջալերում է աղոթել և մեղքերի թողություն խնդրել:

Այս առակը բազմակողմանի հետաքրքիր բովանդակություն ունի, սակայն նշեմ ամենակարևորը.

Կան քրիստոնյաներ, ովքեր Աստծուց մեղքերի թողություն են խնդրում ու փորձում մեղքերից ազատվել, որպեսզի ինքնահաստատեն իրենց <<ես>>-ը ու արդարանան Աստծո առջև, քանի որ իրենց <<ՙես>>-ն են փնտրում և ոչ թե Աստծուն: Ուստի, այս դեպքում խաթարվում է Աստծո և մարդու միջև խաղաղությունը: Եվ մարդու մոտ միշտ հարց է առաջանում, թե ինչու չի ստացվում...

Կան քրիստոնյաներ, ովքեր Աստծուց մեղքերի թողություն են խնդրում ու փորձում մեղքերից ազատվել` դառնալու համար դեպի Քրիստոս, հաստատելու խաղաղություն Աստծո հետ, ճանաչելով իրենց մեղանչական էությունը և Աստծո անսահման փրկչական Սիրո Շնորհը: Իսկ մենք ի՞նչ նպատակով ենք մեղքերի թողություն խնդրում. եկեք դառնանք դեպի մեր հոգու հայելին ու ճանաչենք, թե ինչ նպատակով ենք թողություն խնդրում:

 

Հովհաննես Մանուկյան

 

25.05.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․