24 Նոյեմբեր, Ուր, Հիսնակաց պահքի Ե օր

Գրքեր

Մեկնարկեց «Հոգևոր աջակցություն ընտանիքներին» հերթական համաժողովը

Ապրիլի 18-20-ը Աղվերանում մեկնարկեց «Հոգևոր աջակցություն ընտանիքներին» ծրագրի հերթական փուլի համաժողովը, որ կրում էր «Քրիստոնեական ազատության դրսևորման հնարավորությունը ընտանիքում» ընդհանուր խորագիրը: Համաժողովին մասնակցեցին Հայաստանյայց Առաքելական Սուրբ եկեղեցու թեմերի հոգևորականներ և Քրիստոնեական դաստիարակության կենտրոնի (ՔԴԿ) տարածաշրջանային պատասխանատուներ:

Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ, Մայր Աթոռ Սուրբ Էջմիածնի Քրիստոնեական դաստիարակության կենտրոնը, ԵՀԽ Կլոր Սեղան հիմնադրամի և ՄԱԿ-ի բնակչության հիմնադրամի աջակցությամբ, 2010 թվականից սկսյալ՝ իրականացնում է «Հոգևոր աջակցություն ընտանիքներին» ծրագիրը, որ նպատակ ունի ընտանիք-դպրոց-եկեղեցի համագործակցության միջոցով նպաստել ընտանիքների առջև ծառացած արդի հիմնախնդիրների հաղթահարմանը:

ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, թեմից համաժողովին իր մասնակցությունն էր բերել նաև Զորավոր Ս. Աստվածածին եկեղեցու խորհրդակատար Տեր Վահան քահանա Առաքելյանը: Համաժողովի յուրաքանչյուր օր սկսվում էր Աստվածաշնչյան օրվա ընթերցումով և տվյալ հատվածի մեկնությամբ: Համաժողովի երրորդ օրն աստվածաշնչյան օրվա պատգամին (Հակոբոս 1:13-27) մասնակիցներին հաղորդ դարձրեց Տեր Վահանը:

Համաժողովի խորագրի ներքո բանախոսություններով հանդես եկան Հոգեշնորհ Տ. Ռուբեն վարդապետ Զարգարյանը, Հոգեշնորհ Տ. Սիփան վարդապետ Գևորգյանը, Արժանապատիվ Տ. Գաբրիել քահանա Վարդանյանը և տիար Վարանդ Քորթմոսյանը:

Հոգեշնորհ Տ. Ռուբեն վարդապետ Զարգարյանը, անդրադառնալով քրիստոնեական ազատության թեմային, մասնավորապես նշեց. «Առանց սահմանափակումների կարգավորում չի լինում, որի վառ օրինակն արարչագործության պատմությունն է: Տիեզերքի և մարդկային կյանքում դրված օրենքները կարգավորման նպատակ ունեն: Կարգավորման և իրական ազատության հասնելու համար անհրաժեշտ է սահմանափակել սանձարձակ ազատությունը: Ազատության ընկալումն առանց հոգևոր շերտի՝ մարդկային կյանքը վերածում է քաոսի: Ինչպես առանց մաքրագործման հնարավոր չէ իրական ազատություն, այնպես էլ առանց ազատության հնարավոր չէ մաքրագործում: Չորրորդ պատվիրանը՝ քրիստոնյաներիս համար կիրակի օրը սուրբ պահելու պատգամը, ուղղորդում է մարդուն ազատագրվելու նյութական իրականությունից և նվիրվելու հոգևոր իրականությանը»: Հայր Ռուբենը՝ որպես քրեակատարողական հիմնարկների հոգևոր տեսուչ, մատնանշեց սույն օրինակը, որ իրական ազատություն ձեռք է բերում միայն այն դատապարտյալը, ով բանտից դուրս է գալիս ապաշխարած:

«Հերթական համաժողովի թեմայի կարևոր առանձնահատկությունն այն էր, որ, հարազատ մնալով քրիստոնեական սկզբունքներին, դրսևորում ենք մեր աստվածատուր ազատությունը, որի սահմանը մինչև մեղքն է: Եթե յուրաքանչյուր քրիստոնյա ապրի այս գիտացությամբ, ապա կվայելի մեղքի գերությունից հեռու իրական ազատությունը: Համաժողովին մասնակից հոգևորականներիս ցանկությունն է մեր դպրոցականներին, իրենց ծնողներին և ուսուցիչներին սովորեցնել ապրելու աստվածային ազատությամբ, որպեսզի միշտ աստվածային պատգամները կատարողները լինեն, ինչն էլ իրենց համար կհանդիսանա իրական ազատության սահմանը»,- ասաց Տեր Վահանը:

Համաժողովի ավարտին մասնակիցներին ներկայացվեցին ծրագրային գործառույթները և իրականացվելիք գործունեության համակարգման ակնկալվող աշխատանքները:

 

 

Կարինե Սուգիկյան

21.04.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․