Գրքեր

Մերժում

Մի վաճառական իր երկու ծառաների հետ միասին ուխտագնացության է գնում դեպի բարձրաբերձ լեռներում գտնվող հայտնի վանքը՝ իր հետ տանելով թանկարժեք ընծաներ: Ճանապարհին փրկում է խորը ջրափոսն ընկած գայլին, դուրս բերում այնտեղից և բաց թողնում: Իսկ երբ գիշերում են, գողերը հարձակվում և թալանում են նրանց և միայն մնում է նրա ավանակն ու դրա թամբին կախված սուրը:

Այդպես ձեռնունայն հասնում են վանքը, և վաճառականն աղոթում է և ասում.

-Տե՛ր Աստված, զարմացած եմ. ինչո՞ւ ես ինձ կրկին պատժում: Չէ որ որոշել եմ այսուհետ մշտապես լինել ազնիվ, բարեպաշտ ու խոնարհ մի անձ և արդեն մի քանի օր է՝ պահում եմ պատվիրաններն ու ապրում ըստ Քո ամենազոր կամքի համաձայն:

Եվ այսպես մտորելով իջնում է լեռներից և տեսնում մի խաբեբա մարդու, որը շատ տարիներ առաջ իրենից մեծ գումարներ էր շորթել և փախել: Ծառաների հետ հարձակվում է սրա վրա ու բռնելով նրա օձիքից կատաղած պահանջում իր գումարները՝ սպառնալով սպանել այդ մարդուն: Այնուհետև ետ դառնում, որպեսզի ավանակի թամբին կցված սուրը վերցնի, սակայն ո՛չ ավանակին է տեսնում, ո՛չ էլ սուրը, այլ հեռվում մի քարի վրա նստած Աստծո հրեշտակին և ապշած հարցնում.

-Տիրո՛ջ ամենատես հրեշտակ, որտե՞ղ է իմ ավանակն ու սուրը, ինչո՞ւ է Աստված ինձ նորից պատժում և իմ օգնության խնդրանքը մերժում:

Հրեշտակը պատասխանում է.

-Մինչ խաբեբայից գումարդ էիր պահանջում, գողերը վերադարձան և քո ավանակն ու սուրն էլ տարան: Մի՞թե կարծում էիր, թե արդեն խոնարհ ես ու բարի, քանի որ սրով այդ մարդուն էիր ուզում հարվածել: Աստված նախօրոք ամենայն ինչ տեսնում է և արդարացիորեն քո օգուտի համար քեզ նեղությունների մեջ թողնում:

 

Ճանաչիր իրապես ինքդ քեզ, թե ինչպիսին ես տարբեր իրավիճակներում ու դրվագներում և կհասկանաս, թե ինչու Աստված քո խնդրանքին ցանկությանդ համապատասխան չի արձագանքում:   

 
10.10.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․