Գրքեր

Մերձավորին օգնության ձեռք մեկնողը ներքին մեծ հաղթանակ է ունենում

«Աշխարհում դուք նեղություն կունենաք, սակայն քաջալերվեցե՛ք, որովհետև Ես հաղթեցի աշխարհին» (Հովհ. 16:33),- քաջալերում է Քրիստոս Իր հետևորդներին: Մեր Տիրոջ երկրային կյանքը համայն մարդկության համար մարդասիրության մեծագույն օրինակը հանդիսացավ: Փրկչի օրինակի համաձայն՝ մերձավորին օգնության ձեռք մեկնողը ներքին մեծ հաղթանակ է ունենում: Ողջ աշխարհում բազմաթիվ գիտություններ կան, որ ուսումնասիրվում են մարդկանց կողմից, բայց մարդասիրությունը, ըստ եկեղեցու հայրերի, ևս գիտություն է՝ բոլոր մյուս գիտություններից տարբերվող և բարձր համարվող գիտություն:

Դեկտեմբերի 28-ին, Զորավոր Ս. Աստվածածին եկեղեցու համայնքը, հոգևոր հովիվ Տեր Գրիգոր քահանա Գրիգորյանի գլխավորությամբ, երկրորդ անգամ այցելեց Միրզոյան ընտանիքին, որ բնակվում է Երևանի Շիրակի 20/23 հասցեում: Սոցիալապես անապահով ընտանիքը բաղկացած է հինգ հոգուց: Տասներկու տարի է, ինչ ընտանիքի կարիքները փորձում է մասամբ հոգալ ընտանիքի մայրը՝ Սաթենիկ Մարդոյանը (36 տ.), ով իր նվազագույն աշխատավարձի երեսուն տոկոսն ամեն ամիս վճարում է ամուսնու վիրահատության համար վերցրած վարկի արդեն քառապատկված գումարը մարելու համար: Ընտանիքի մայրը նշեց, որ իր աշխատավարձի և սկեսուրի հաշմանդամության գումարները չեն բավարարում անգամ իրենց նվազագույն կարիքները հոգալու համար, միայն էլեկտրաէներգիայի վարձն են վճարում, իսկ մյուս կոմունալ վարձերը չվճարելու պատճառով՝ մեծ պարտքերի և դատարանի առջև են կանգնել: «Ամուսինս տասներկու տարի առաջ ծնոտի և ոտքի կոտրվածքներ է ստացել, տասնմեկ վիրահատություն տարել, սակայն տարեցտարի մեծ բարդություններ են առաջացել նրա մոտ: Այժմ ամուսնուս մոտ թրոմբոզ վիճակ է, և ոտքը սկսել է սևանալ: Այս տարի բժշկասոցիալական փորձաքննությամբ ամուսնուս զրկեցին հաշմանդամության 3-րդ խմբից: Սկեսուրս 2-րդ խմբի հաշմանդամ է, անկողնային հիվանդ, շաքարային դիաբետ ունի, նրա մոտ ևս թրոմբներ են առաջացել, ոտքերը վերքոտվել են՝ գանգրենայի վտանգ ստեղծելով: Գումար չունենալու պատճառով սկեսուրս և ամուսինս չեն կարողանում պարբերաբար բուժումներ անցնել և օր օրի նրանց վիճակն ավելի է վատանում: Շատերին եմ դիմել օգնության, բայց միայն եկեղեցին արձագանքեց, ինչի համար անչափ շնորհակալ եմ Տեր Գրիգորին և աջակից անձին»,- ասաց Սաթենիկը:

Տեր Գրիգորը բժշկության աղոթք կարդաց ընտանիքի համար և նրանց հանձնեց դրամական օգնություն (50 000 դրամ), որ տրամադրել էր Ֆրանսիայում բնակվող Քրիստինե Բարսեղյանը:

«Արդ, դուք, որ հնազանդվելով ճշմարտությանը՝ սրբեցիք ձեր անձերը, որպեսզի ապրեք անկեղծ եղբայրասիրությամբ, սիրեցե՛ք միմյանց սրտանց, մաքուր սրտով. որովհետև Աստծո կենդանի և մշտնջենական խոսքով դուք վերստին ծնվեցիք, իբրև զավակները ոչ թե մահկանացու մի ծնողի, այլ անմահի» (Ա Պետրոս 1:22):

 

Կարինե Սուգիկյան

28.12.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․