«Մեծ իմաստուն է նա, որ սեր է գոյացնում»

Առաքինությունների մայրը հանդիսացող սերը Տիրոջ հետևորդների գործողությունների հիմքն է կազմում, այն ճշմարիտ քրիստոնյաների բնորոշող գիծն է: «Եթե դուք միմյանց սիրեք, դրանով մարդիկ կիմանան, որ դուք Իմ աշակերտներն եք»,- ասում է Քրիստոս (Հովհ. 13:35): Եկեղեցական համայնքային կյանքից ներս իրականացվող յուրաքանչյուր սոցիալական ծրագիր ճշմարիտ սիրո արտահայտությունն է:

Հունվարի 25-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը սիրիահայ համայնքից Փոստաջյան Վարդենիին (50 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Վարդենին նշեց, որ Սիրիայում ծագած պատերազմական գործողությունների պատճառով իրենց տունն ամբողջովին ավերվել է և իրենք, մազապուրծ փրկվելով, տեղափոխվել են Հայաստան: Երկու տարի է, ինչ Վարդենին ամուսնու՝ Խաչատուրյան Վազգենի (55 տ.), տղայի՝ Հարությունի (23 տ.) և աղջկա՝ Մարիայի (20 տ.) հետ վարձակալությամբ բնակվում է Կիլիկիա թաղամասի Պրահայի փողոցի 65 հասցեում: «Միայն ամուսինս է աշխատում, այն էլ նվազագույն աշխատավարձով: Տղաս էլ բենզալցակայանում է աշխատում: Բայց իրենց վաստակածը չի բավարարում, որ տան և կոմունալ վարձերը վճարենք ու մյուս կարիքները հոգանք: Իմ առողջական վիճակը թույլ չի տալիս, որ հայաստանյան պայմաններին հատուկ երկարաժամյա աշխատանքի անցնեմ: Աղջիկս էլ ուսանում է Եվրոպական համալսարանի զբոսաշրջության ֆակուլտետում, իր ուսման վարձը հոգում է պետությունը: Անչափ շնորհակալ եմ Տեր Գրիգորին և աջակից անձին, որ օգնության ձեռք մեկնեցին նաև իմ ընտանիքին»,- ասաց Վարդենին:

«Մեծ իմաստուն է նա, որ սեր է գոյացնում: Արդ, ինչպես առաքյալները քարոզով, մարգարեները՝ սովորեցնելով, նույնպես և դուք Աստծուց մեծ պարգև կստանաք, եթե ճշմարիտ սիրով սիրելիներ բազմացնեք: Ինչպես որ թագն ու ծիրանին ցույց են տալիս, թե ով է թագավորը, իսկ առանց նրանց, եթե նույնիսկ ոսկյա հագուստ էլ ունենաս, միևնույն է թագավոր լինելդ չի իմացվի, նմանապես, եթե ամեն տեսակի առաքինություններ ունենաս և եթե նույնիսկ կարողանաս հրաշքներ գործել, սակայն սեր չունենաս, չի իմացվի, թե արդյո՞ք դու պատկանում ես Քրիստոսին: Քրիստոնյան ճանաչվում է իր սիրով, որ կնիք է, այսինքն՝ Քրիստոսի նշանն է»,- ասել է Բարսեղ վարդապետ Մաշկևորցին:

Կարինե Սուգիկյան