Մեծ ընտանիքի ծառայասիրության ուղին

Ընտանիքն ամուր է և երջանիկ, երբ նրա բոլոր անդամները փոխադարձ սիրով և համագործակցությամբ աջակից են միմյանց: Մեծ պահքի շրջանում Զորավոր Սուրբ Աստվածածին եկեղեցու մեծ և ամուր ընտանիքի՝ համայնքի, անդամները, իրենց սրտում և մտքում ունենալով սուրբգրային այն պատգամը, թե՝ բարի են աղոթքները՝ պահեցողություններով, ողորմություններով և արդարություններով (Տոբիթ 12:8), անցնում են ծառայասիրության իրենց ուղին: Այս ընտանիքի յուրաքանչյուր անդամ մեծ նախանձախնդրությամբ և իր կարողության չափով իր մասնակցությունն է ունենում բոլոր  այն բարեգործական ծրագրերին, որ կազմակերպում է համայնքը հոգևոր հովիվ Տեր Գրիգոր քահանա Գրիգորյանի գլխավորությամբ:

Փետրվարի 15-ին Զորավոր Սբ. Աստվածածին եկեղեցու մեծ ընտանիքի հերթական այցն ուրախություն պատճառեց Մալաթիա-Սեբաստիա թաղամասի Շրջանային 2/14 հասցեում ապրող անապահով ընտանիքին: Հինգ հոգուց բաղկացած այս ընտանիքում ապրում են տատիկը, պապիկը և երեք անչափահաս թոռնիկները՝ Սարգսյան Էրիկը (15 տ.), երկվորյակներ Անահիտն ու Զարուհին (13 տ.): Երեխաների մայրը լքել է ընտանիքը, իսկ հայրը գտնվում է Ռուսաստանի Դաշնությունում: Արդեն վեց տարի է, որ երեխաների խնամքով զբաղվում են միայն պապիկն ու տատիկը՝ 76-ամյա Էդուարդ Սարգսյանը և 63-ամյա Անահիտ Իսպիրյանը: Կարիքի մեջ գտնվող ընտանիքը վարձակալությամբ է ապրում երկու փոքր սենյակներից բաղկացած խոնավ տանը, որի անմխիթար վիճակում գտնվող սանհանգույցն ընդհանուր է՝ այդ բակում բնակվող մի քանի ընտանիքների համար: Մահճակալի բացակայության պատճառով աղջիկներից մեկը ստիպված է լինում քնելու խոնավ հատակին: Տան միակ աշխատողը՝ երեխաների պապիկը, ցավով նշեց, որ այժմ ի վիճակի չէ աշխատելու՝ աչքի հետ կապված խնդիր ունենալու պատճառով: Սոցիալական աջակցության վարչության «Փարոս» ծրագրի միջոցով պետպատվերի շրջանակում նա կարող է վիրահատվել, բայց հնարավորություն չունի վճարելու աչքի ոսպնյակի գումարը՝ 80 000 դրամ, որ չի ներառնվում պետպատվերի շրջանակում: Անահիտ Իսպիրյանը ևս առողջական խնդիրներ ունի՝ թքագեղձի ուռուցք և նա էլ աչքերի վիրահատության կարիք ունի, բայց հնարավորություն չունի աչքերի ոսպնյակների գումարը վճարել, որ կազում է 110 000 դրամ: Այժմ ընտանիքը բնակարանի վարձը, կոմունալ վճարումներն առաջնահերթ վճարում է Էդուարդ Սարգսյանի թոշակի և «Փարոս»-ի տրամադրած գումարով, իսկ օրվա հացը ստիպված է լինում պարտքով վերցնել:

Բժշկության աղոթք կարդալուց հետո՝ Տեր Գրիգորն ընտանիքին հանձնեց եկեղեցու համայնքի կողմից տրամադրված դրամական օգնությունը, սննդի փաթեթները և անկողնային պարագաները:

«Մարդը ողորմություն գործելու է մղվում ոչ միայն Աստծո հանդեպ սիրուց, այլև իր բնությունից: Որովհետև մարդը, որի խառնվածքը բարեկարգ է, բնական կերպով մղվում է ընկերոջը գթալու» (Պողոս պատրիարք Ադրիանուպոլսեցի):

Կարինե Սուգիկյան