Գրքեր

Միանգամից շատ գործ չձեռնարկենք

Մարդիկ այսօր պարզ կյանքով չեն ապրում: Այդ պատճառով էլ նրանց ուշադրությունը շատ է շեղվում: Նրանք միանգամից շատ բան են ձեռնարկում և թաղվում են բազմաթիվ հոգսերի մեջ: Իսկ ես նախ մեկ կամ երկու գործ եմ ավարտում և հետո միայն սկսում եմ ուրիշ գործերի մասին մտածել: Երբեք միանգամից շատ գործ չեմ ձեռնարկում: Այժմ ինչ-որ մի բանի մասին եմ մտածում: Առաջինն ավարտելով՝ կսկսեմ երկրորդի մասին մտածել: Որովհետև եթե առաջինը չավարտած, երկրորդը սկսեմ՝ հանգիստ չեմ ունենա: Մարդ գլուխը կորցնում է, երբ միաժամանակ շատ գործեր է ձեռնարկում: Նույնիսկ ուղղակի [միաժամանակ] այդ բոլոր գործերի մասին մտածելն արդեն իսկ շիզոֆրենիայի է հասցնում:

Մի անգամ հոգեկան խանգարումով մի երիտասարդ եկավ իմ խուց: Նա վստահեցնում էր, որ իր ծնողներից ժառանգականորեն իրեն փոխանցված ինչ-որ զգայունություն ունի: «Ի՞նչ ժառանգականության մասին ես խոսում,- ասացի նրան,- նախևառաջ քեզ հանգիստ է պետք: Հետո ուսումդ ավարտիր: Դրանից հետո բանակում ծառայիր, իսկ այնուհետև փորձիր աշխատանքի տեղավորվել»: Խեղճը լսեց խորհուրդներս և իր ճանապարհը գտավ: Նույն կերպ էլ մարդիկ իրենք իրենց են գտնում:

- Հա՛յր, ես էլ եմ աշխատանքից արագ հոգնում և չեմ կարողանում հասկանալ, թե պատճառը որն է:

- Քեզ համբերությունն է պակասում: Իսկ անհամբերությանդ պատճառը միանգամից շատ բանի լծվելու մեջ է: Դու ուժերդ ցրիվ ես տալիս տարբեր ուղղություններով և ուժասպառ ես լինում: Իսկ դա քեզ ջղագրգիռ վիճակի է հասցնում, որովհետև նախանձախնդրություն ունես և սիրտդ ցավում է գործի համար:

Երբ ես ընդհանրական մենաստանում էի ապրում, ինձ հանձնարարել էին ատաղձագործական արհեստանոցում աշխատել: Աշխատանքի պատասխանատուն ուրիշ ատաղձագործ էր՝ ծեր վանական հայր Իսիդորը: Խեղճը մի կաթիլ համբերություն չուներ: Ասենք, սկսում էր պատուհան պատրաստել, հետո նյարդայնանում էր, մի կողմ էր դնում պատուհանն ու սկսում դռները պատրաստել: Հետո նորից էր նյարդայնանում, մի կողմ էր նետում դռներն ու բարձրանում էր տանիքը վերանորոգելու: Այսպիսով ոչինչ մինչև վերջ չէր հասցնում, կիսատ էր թողնում: Տախտակների մի մասը կորցնում էր, մյուսները սխալ էր սղոցում… Ահա՛ այսպես մարդն իրեն տանջում է, տանջում և ոչնչի չի հասնում:

Իսկ այնպիսի մարդիկ էլ կան, որոնց ուժերը սահմանափակ են, նրանք մեկ-երկու գործից ավել չեն կարող կատարել: Բայց միևնույն ժամանակ շատ բան են ձեռնարկում, բազմաթիվ հոգսերի մեջ են խճճվում, ոչ մի բան ինչպես հարկն է չեն անում և դեռ ուրիշներին էլ են խառնում իրենց հոգսերի մեջ: Հնարավորինս պետք է ձգտել մեկ-երկու գործից ավելին չձեռնարկել, դրանք ինչպես հարկն է ավարտին հասցնել և դրանից հետո, թարմ ուղեղով, նոր բան ձեռնարկել: Որովհետև եթե միտքդ ցրվի, ապա ինչպե՞ս պիտի կարողանաս հոգևոր կյանք վարել: Ինչպե՞ս կկարողանաս Քրիստոսի մասին հիշել:

 

 

Հայր Պաիսիոս Աթոսացու «Ցավով և սիրով՝ ժամանակակից մարդու մասին» գրքից

Ռուսերենից թարգմանությունը՝ Էմիլիա Ապիցարյանի

 

06.04.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․