1 Մարտ, Բշ, Մեծ պահքի ԺԵ օր

Գրքեր

Նավասարդ Սրբազանը հաջողություն մաղթեց Երևանի նորընտիր քաղաքապետին

Հոկտեմբերի 13-ին Երևանի քաղաքապետարանում տեղի ունեցավ նորընտիր քաղաքապետի երդմնակալության արարողությունը, որն իրենց ներկայությամբ պատվել էին Ն.Ս.Օ.Տ.Տ. Գարեգին Բ Ամենայն Հայոց Հայրապետը, ՀՀ նախագահ Արմեն Սարգսյանը, ՀՀ վարչապետ Նիկոլ Փաշինյանը, ՍԴ նախագահ Հրայր Թովմասյանը, ԲԴԽ նախագահ Գագիկ Հարությունյանը, Աժ պատգամավորներ, կառավարության անդամներ, մտավորականներ ու հասարակական գործիչներ:

Հայկ Մարությանը հանդիսավորությամբ երդվեց ազնվորեն ու բարեխղճորեն կատարել պարտականությունները, ծառայել Երևանին ու երևանցիներին՝ խորին շնորհակալություն հայտնելով իրեն վստահելու համար:

Երևանի թանգարանում պահվող քաղաքապետի խորհրդանշական լանջաշղթան Հայկ Մարությանին հանձնեցին Երևանի պատվավոր քաղաքացի Տիգրան Մանսուրյանն ու Երևանի ավագանու անդամ Արթուր Իսպիրյանը:

Այնուհետև Հայկ Մարությանը հրավիրեց Արարատյան Հայրապետական թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանին՝ օրհնության խոսք ասելու:

Նավասարդ Սրբազանը, ողջունելով ներկաներին, ի մասնավորի ասաց.

«Աստվա՛ծ օգնական, Վեհափա՛ռ Տեր, 
Մեծարգո՛ նախագահ, 
Մեծարգո՛ վարչապետ, 
Սիրելի՛ քաղաքապետ, 
Պատվարժա՛ն պետական այրեր, 
Նորընտիր ավագանու հարգարժա՛ն անդամներ, 
Սիրո ջերմ ողջույններ ամենքիս և Աստծո օրհնությունը բոլորիս այս բացառիկ օրվա առթիվ:

«Առաջնորդն ու նրա ժողովուրդը այնպես պետք է սիրեն միմյանց, որ դժվար լինի որոշել, թե ով է առավել սիրում: Քանզի պիտի ջանան սիրով միմյանց հաղթել, առաջնորդը՝ ժողովրդի օգտի, և ժողովուրդը՝ առաջնորդի հանգստության և խաղաղության»:

Հարգարժա՛ն քաղաքապետ, մեր անկեղծ բարեմաղթանքն է, որ Պողոս պատրիարք Ադրիանուպոլսեցու այս հոգեշահ խրատը դառնա Ձեր նոր կենսագրության կարգախոսը: Որպես Հայոց Ոստանի տասներկուերրորդ քաղաքապետ՝ գալիք դժվարությունները կկարողանաք հաղթահարել սիրո ամենազոր ուժականությամբ, երիտասարդական ավյունով առլեցուն, բարոյական մեծ պատասխանատվությամբ՝ կերտելով երևանցիների երազանքների մայրաքաղաքը: Մենք լիահույս ենք, որ Ձեր եռանդուն ջանքերը այս նոր առաքելության մեջ կտան իրենց բարի պտուղները՝ ի ուրախություն Ձեզ անչափ սիրող երևանցիների:
Սիրելի՛ քաղաքապետ և նորընտիր ավագանու հարգարժա՛ն անդամներ, 
Երևանի քաղաքապետարանի և Արարատյան Հայրապետական թեմի համագործակցությունը միշտ էլ եղել է արդյունավետ:

Մենք վստահո՛ւմ ենք ձեզ և պատրաստ ենք ուժերի ներածին չափով աջակցել ձեր ազգանվեր գործունեությանը: Վստահաբար կարող ենք ասել, որ ձեր միասնականության, նվիրումի և համագործակցության շնորհիվ «Քա՛յլ արա, Երևա՛ն» տեսլականը կդառնա իրականություն: 
Քա՛յլ արա, Երևա՛ն, քա՛յլ արա, երևանցի՛, ձեռք ձեռքի բռնած, միասնական քայլքով մոտեցիր Աստծուն, հետևիր Նրա գծած ճանապարհին, որ Սիրո ճանապարհն է: Քայլի՛ր այդ ճանապարհով, որպեսզի զորանաս, կապվես հողիդ ու հայրենիքիդ, քո երազանքներին և քո վաղվա օրվան:

Քա՛յլ արա, Երևա՛ն, քայլի՛ր Սիրո ճանապարհով: Թող քո սիրասուն զավակների հավատարմության ու նվիրումի ալեծուփ երթը թնդացնի մեր հողը՝ տոկուն պահելով հայոց միասնականության և անսասանության ոգին:

Բյուր օրհնություն, սրտաբուխ շնորհավորանքներ և բարեմաղթանքներ Հայկ Մարությանին՝ երդմնակալության այս պատասխանատու պահին: Մեր մաղթանքն է, որ Բարեսեր Աստված հաջողությամբ պսակի նրա ազգաշահ ձեռնարկումները: Պարգևի նրան կորով, երիտասարդական խանդավառություն, որպեսզի անխաթար շարունակի իր ընթացքը և բորբոք պահի սերը Երևանի և երևանցիների հանդեպ: «Տեր Աստված մեր, առաջնորդիր մեզ և ուսուցանիր մեզ արդարությամբ գնալ Քո ճանապարհներով, պահիր մեր կյանքը խաղաղության մեջ և մեր ընթացքը` Քեզ հաճելի. ամեն» (ժամագիրք)»:

Վերջում նորընտիր քաղաքապետին շնորհավորեց նաև ՀՀ վարչապետ նիկոլ Փաշինյանն՝ իր խոոսքում կարևորելով Երևանի ավագանու ընտրությունները` քաղաքական, համապետական իմաստով. «Մենք պետք է կարողանանք հնարավորինս շատ մարդկանց պոտենցիալ ներգրավել մեր ընդհանուր գործի իրականացման մեջ և պատրաստ ենք համագործակցության բոլոր ցանկացողների հետ: Չպետք է առաջնորդվենք հինը ժխտելու, քանդելու մղումով: Մենք երբեք չենք ասել, որ երրորդ հանրապետության գոյության ընթացքում մեր երկրում արժեքներ չեն ստեղծվել: Մեր խնդիրն է նոր էջ բացել մեր պատմության մեջ, որտեղ գերակա կլինի համաձայնությունը»:

 

Արարատյան Հայրապետական թեմի տեղեկատվական բաժին

13.10.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․