«Ողորմությունները բարի պարգև են բոլորին»

Մեծ պահքի շրջանում Զորավոր Սբ. Աստվածածին եկեղեցու համայնքը՝ ԱՀԹ առաջնորդական փոխանորդ գերաշնորհ Տեր Նավասարդ արք. Կճոյանի օրհնությամբ և հոգևոր հովիվ Տեր Գրիգոր քահանա Գրիգորյանի գլխավորությամբ, շարունակում է իր տնայցներն անապահով ընտանիքներին:

Մարտի 3-ին համայնքը հերթական՝ 14-րդ այցն ունեցավ Շրջանային 2/14 հասցեում մեկ սենյականոց բնակարանում վարձակալությամբ բնակվող Աղանյան ընտանիքին: 42-ամյա Անահիտ Աղանյանը միայնակ է խնամում իր երկու զավակներին՝ 23-ամյա Անի Աղանյանին և 4-ամյա Համլետ Վանյանին: Նպաստով ապրող ընտանիքը դժվարությամբ է իր կարիքներն հոգում, Անին նոր է սկսել աշխատել, իսկ Անահիտն ի վիճակի չէ աշխատել՝ կրծքագեղձում նորագոյացություններ ունենալու պատճառով:

Ընտանիքի հետ զրույցից հետո՝ Տեր Հայրը բժշկության աղոթք կարդաց և նրանց հանձնեց սննդի փաթեթներ ու հիգիենայի պարագաներ:

Ողորմության բազմաթիվ օրինակների կարելի է հանդիպել Սբ. Գրքում: Հին Կտակարանի Տոբիթի գրքում կարդում ենք, թե Տոբիթն ողորմած լինելու մասին ինչ է խրատում իր որդուն. «Քո ունեցվածքից ողորմություններ կանես. ողորմություն անելիս թող քո աչքը ագահ չլինի. երեսդ չդարձնես բոլոր աղքատներից, և Տեր Աստվածն էլ Ի՛ր երեսը չի դարձնի քեզանից: Ինչքան շատ ունենաս, ըստ այդ շատության կանես քո ողորմությունները, եթե քիչ ունենաս՝ ըստ քչի: Չհապաղես ողորմություններ անել, քանի որ դրանով բարիքներ կգանձես քո կյանքի օրերին: Արդարև, ողորմությունները փրկում են մահվանից և թույլ չեն տալիս մտնել խավարի մեջ. ողորմությունները բարի պարգև են բոլորին, ովքեր այդ անում են Աստծո առաջ» (Տոբիթ 4:7-12):

Կարինե Սուգիկյան