Օգտակար խրատներ պոռնկությունից զգուշանալու մասին

Հայր Հովհաննեսը պատմեց և ասաց. «Մեծատուն և հույժ գեղեցիկ մի պոռնիկ կար Եգիպտոսում, որի մոտ իշխաններն էին մտնում: Մի օր նա անցնում էր եկեղեցու կողքով և կամեցավ ներս մտնել, իսկ կիսասարկավագները, որ դրսում էին, թույլ չտվեցին ներս մտնել` ասելով. «Արժանի չես մտնելու Տիրոջ տունը, որովհետև  պիղծ ես»: Եվ մինչ նրանք վիճում էին իրար հետ, եպիսկոպոսը լսեց աղմուկը, և եկավ նրանց մոտ: Կինը նրան ասաց. «Թույլ չեն տալիս ինձ եկեղեցի մտնել»: Եպիսկոպոսը նրան ասաց. «Դու արժանի չես մտնելու, քանզի պիղծ ես»: Կինը զղջալով ասաց. «Այլևս պոռնկություն չեմ անի»: Եպիսկոպոսը նրան ասաց. «Եթե այստեղ բերես քո կարասիները, կհամոզվեմ, որ զղջում ես»: Եվ նա շուտափույթ  բերեց դրանք, իսկ եպիսկոպոսը վերցնելով՝ այրեց բոլորը: Պոռնիկը լալով մտավ եկեղեցի` ասելով. «Եթե այստեղ այսպես եղավ ինձ հետ, այնտեղ ինչե՜ր կկրեմ»: Եվ ապաշխարելով` ընտիր անոթ դարձավ»:

«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016