19 Մարտ, Գշ, Մեծ պահքի ԼԷ օր

Գրքեր

Ուխտավորներն իրենց խոնարհումը բերեցին Սբ. Կարապետի մասունքի առջև

Ուխտավորն իր հավատքի ճանապարհն ամեն անգամ իմաստավորում և վերանորոգում է աղոթքի ճանապարհով՝ ուխտագնացությամբ: Աղոթքի հերթական ճանապարհը Զորավոր Սբ. Աստվածածին եկեղեցու համայնքը, խորհրդակատար Տեր Վահան քահանա Առաքելյանի գլխավորությամբ, անցավ Սբ. Հովհաննես Մկրտչի գլխատման հիշատակության օրը՝ ապրիլի 2-ին՝ ուխտի մեկնելով Գավառի Սբ. Կարապետ եկեղեցի: Սրբի հիշատակության օրը Հայ Առաքելական Սբ. եկեղեցին նշում է Սբ. Զատկին հաջորդող շաբաթ օրը: Այս տոնը սրբոց հիշատակություններից միակն է, որ հանդիպում է Հինանց շրջանում: Սրբերի հիշատակությունը դարեր շարունակ նշվել է Սբ. Պատարագով, ուխտագնացություններով՝ հոգևոր ուրախություն պատճառելով մասնակիցներին: 

Զորավոր Սբ. Աստվածածին եկեղեցու ուխտավորները նախ եղան Գավառ քաղաքի առաջնորդանիստ Սբ. Աստվածածին եկեղեցում, ապա հոգևորականաց դասի և տարբեր թեմերից ժամանած մյուս ուխտավորների հետ միասին մասնակցեցին Սբ. Հովհաննես Մկրտչի մասունքը դեպի Գավառի Սբ. Կարապետ եկեղեցին տեղափոխող հանդիսավոր թափորին: Նշենք, որ Սբ. Հովհաննես Մկտչի գլխատման հիշատակության օրը, սրբի մասունքը, օրհնությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, Մայր Աթոռ Սուրբ Էջմիածնից տեղափոխվել էր Գեղարքունիքի թեմ: Սբ. Կարապետ անունը կրող 19-րդ դարի սրբավայրում ուխտավորները մասնակցեցին Սուրբ և Անմահ Պատարագին: 106 տարվա լռությունից հետո միայն չորս տարի է, ինչ սրբավայրը հիմնանորոգումից և վերաօծումից հետո, իր դռներն է բացել հավատավորների առջև:

Սբ. Պատարագին քարոզխոսեց Տավուշի թեմի առաջնորդ Գերաշնորհ Տեր Բագրատ եպս. Գալստանյանը, ով թեմի հավատացյալների հետ միասին ևս ուխտավորաբար գտնվում էր Սբ. Կարապետ եկեղեցում: Սրբազան Հայրն անդրադարձավ ավետարանական այն հատվածին, որ պատմում է հարուցյալ Քրիստոսի և Սիմոն Պետրոսի երկխոսության մասին: «Մեր Տիրոջ երեք հարցումներն ուղղված Պետրոս առաքյալին, թե՝ սիրո՞ւմ ես Ինձ, տրտմեցնում է առաքյալին: Աստված, մեզ ճանաչելով, ամեն օր է այս հարցն ուղղում՝ սիրո՞ւմ ես Ինձ, ոչ թե՝ հարգո՞ւմ ես, երկրպագո՞ւմ, պաշտո՞ւմ կամ վախենո՞ւմ, այլ՝ սիրո՞ւմ ես Ինձ: Աստծո հետ հարաբերության այդ սկզբունքի մեջ ոչ մի զիջողականություն չկա: Աստծո հանդեպ սերը չի կարող լինել մակերեսային, այլ այն պետք է արտահայտվի միայն գործերով: Մենք որպես քրիստոնյաներ չենք կարող «սպառողական» հավատքի կյանք ունենալ, այլ պետք է առանց վախենալու «արտադրող» քրիստոնյաներ լինենք ամենուր: Եթե մենք հավատում և դավանում ենք Ճշմարտությանը, ապա ինչո՞ւ պետք է այն թաքցնենք: Աստծուն սիրող անձնավորության ուղին նահատակության ուղի է: Ոչ թե արյան նահատակության մասին է խոսքը, այլ՝ արդարության գործի: Արդարության խոսքի ազդարարողն ու գործադրողն էր Սբ. Հովհաննես Մկրտիչը, ում, կենդանի ներկայության առջև այժմ գտնվելով, խնդրում ենք նրա բարեխոսությունը: Մեր այցելությունը Սբ. Հովհաննես Մկրտչին չպետք է սահմանափակվի միայն նրա մասունքի առջև մեր խոնարհումը բերելով, այլ այն, նրա օրինակի համաձայն, պետք է թափանցի նաև մեր կյանքից ներս»,- ասաց Բագրատ Սրբազանը՝ խնդրելով ներկաներին, որ իրենց աղոթքներում հիշեն նաև մեր քաջազուն զինվորներին և սահմանամերձ բնակչությանը:

Սբ. Պատարագի ավարտին ներկաները, Սբ. Հովհաննես Մկրտչի բարեխոսությունը հայցելով, հաղորդակից եղան Սբ. Հովհաննես Մկրտչի մասունքի օրհնությանն ու զորությանը: Այնուհետև եկեղեցու բակում սրբի մասունքով Անդաստանի կարգ կատարվեց, ապա ուխտավորները մատաղի օրհնության կարգից հետո մասնակից եղան սիրո ճաշին:

Զորավոր Սբ. Աստվածածին եկեղեցու ուխտավորները շարունակեցին իրենց ուխտուղին՝ լինելով Նորատուս գյուղի 728 խաչքարերով հարուստ հին գերեզմանատանը: 9-17-րդ դարերին թվագրված խաչքարերը դիտելուց հետո Տեր Վահանն ուխտավորների հետ զրույց ունեցավ՝ մաղթելով, որ բոլորի ուխտն ի կատար ածվի, և Աստված զորացնի Հայոց աշխարհը՝ պարգևելով Իր երկնառաք խաղաղությունը:

Սբ. Հովհան Ոսկեբերանը սրբերի հիշատակության հետ կապված ասել է. «Մարտիրոսների հիշատակությունը տոն է և հոգևոր ուրախություն: Նրանք չարչարվել են, իսկ մենք բերկրում ենք, նրանք հերոսություն են գործել, մենք ուրախանում ենք, նրանց պսակը փառքն է բոլորի, ավելի շուտ փառքը ողջ եկեղեցու»: Ապա սուրբը մարտիրոսական քաջագործությունը համեմատել է օլիմպիական խաղերի հաղթանակի հետ. «Հաղթում է մեկը, ուրախանում են բոլորը: Սրբերը եկեղեցու գանձերն են՝ լի թանկարժեք մարգարիտներով: Նյութական հարստությունն անցնում է, հագուստը մաշվում է, տները քանդվում են, իսկ հոգևոր հարստությունն այլ է, սրբերը մշտապես փայլում են իրենց լույսի փառքով»:

 

 

Կարինե Սուգիկյան

02.04.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․