Գրքեր

«Որդյա՛կ, ըստ քո ունեցվածքի բարությո՛ւն արա»

Օգոստոսի 8-ին Զորավոր Ս. Աստվածածին եկեղեցու համայնքը, «Արև-երեխաներ» երեխաների առողջության և զարգացման կենտրոնի հետ համատեղ, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և հոգևոր հովիվ Տեր Գրիգոր քահանա Գրիգորյանի գլխավորությամբ, այցելեց Գյումրու «Երեխաների տուն» մանկատուն: Այցի ընթացքում կազմակերպվեց մանկատան Դաունի համախտանիշ ունեցող քսանյոթ երեխաների բուժհետազոտություն: Երեխաները Գյումրու Մոր և մանկան ավստրիական հիվանդանոցում անցան արյան ցիտոգենետիկական հետազոտություն, կարիոտիպ, հորմոնալ և արյան կլինիկական հետազոտություններ: Բուժհետազոտությունների ծախսերն այս անգամ հոգաց Հակոբյան ընտանիքը՝ ի հիշատակ իրենց հոր՝ Արտուշ Հակոբյանի ծննդյան 100-ամյակի առթիվ:

Տեր Գրիգորը նշեց, որ Գյումրու «Երեխաների տուն» մանկատան Դաունի համախտանիշ ունեցող երեխաները ևս, համայնքի և «Արև-երեխաներ» երեխաների առողջության և զարգացման կենտրոնի աջակցությամբ, բուժհետազոտությունից հետո կանցնեն վերականգնողական բուժական ընթացք:

Սուրբ Գիրքն ուսուցանում է. «Միմյանց համար աղոթք արեք» (Հակոբոս 5.16), և քանի որ Աստծո համար բոլորը կենդանի են (Մատթեոս 22.32), ուստի որքան կարևոր է ննջեցյալի հոգու փրկության համար աղոթելը, նույնքան էլ նրա համար ողորմություն անելը: Ոչ մի բարիք չի մոռացվում և չի կորչում, հատկապես ննջեցյալի համար կատարված աղոթքն ու ողորմածությունը: Հին ուխտի եկեղեցում սովորություն է եղել մահացածների հիշատակի համար հաց կտրել և աղքատներին բաժանել (Բ Օրենք 26:14; Երեմիա 16:7), հարազատների մահվան առիթով պահք պահել (Բ Թագ. 1:12): Աստվածաշնչյան կերպարներից Բոոսն էլ էր մեռելների և ողջերի համար ողորմություն անում (Հռութ 2:20):

«Որդյա՛կ, ըստ քո ունեցվածքի բարությո՛ւն արա և Տիրոջն արժանի զոհ մատուցիր: Ողորմության շնորհը թող բաշխվի բոլոր ողջերին, բայց և մեռածների համար մի՛ խնայիր շնորհներդ» (Սիր. 14:11; 7:37):

 

Կարինե Սուգիկյան

08.08.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․