1 Հունիս, Բշ, Բ օր Հոգեգալստյան, Պահք

Գրքեր

«Ով մնում է սիրո մեջ, նա միացած է մնում Աստծուն»

Քրիստոսի առաքյալներից աստվածային սիրո քարոզիչ և սիրո առաքյալ սուրբ Հովհաննեսը պատգամում է, որ առանց սիրո անհնար է ճանաչել Աստծուն. եթե ասում ենք, որ սիրում ենք Աստծուն, բայց ատում ենք մեր եղբորը, նշանակում է, որ չենք սիրում նաև Աստծուն. «Ով մնում է սիրո մեջ, նա միացած է մնում Աստծուն, և Աստված էլ՝ միացած նրան: Եթե Աստծո հանդեպ սերն այսպես կատարյալ է մեր մեջ, ապա դատաստանի օրը համարձակ կկանգնենք Աստծո դիմաց, որովհետև այս աշխարհում ապրում ենք ճիշտ այնպես, ինչպես Քրիստոսն Ինքն ապրեց» (Ա Հովհ. 2:3, 4:16-18): Շատ հաճախ մարդիկ իրենց կյանքում մոռանում են ամենագլխավորի՝ մերձավորի հանդեպ սիրո մասին: Սուրբ Գիրքն, առաջին նորադարձների կյանքը նկարագրելով, մատնանշում է այն սիրո ոգին, որով նրանք տարբերվում էին մյուսներից: Եվ Տերը դատաստանի օրը մարդկանց հարցնելու է, թե ինչպես են վերաբերվել մերձավորին. այցելե՞լ են հիվանդին, բանտարկյալին, կերակրել ու մխիթարե՞լ են կարիքավորին (Մատթ. 25:31-44):

Եկեղեցական համայնքային կյանքից ներս սիրո ոգին է, որ կյանքի է կոչում մերձավորին աջակցելու մի շարք ծրագրեր: Դեկտեմբերի 13-ին, Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը, Զորավոր Ս. Աստվածածին եկեղեցու և «Արև-երեխաներ» ՀԿ-ի սոցիալական ծրագրերի շրջանակում, Հարությունյան Թեհմինեին (37 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ մեր հայրենակցուհիներից մեկը՝ չցանկանալով իր անունը նշել: Թեհմինեն իր ամուսնու և երկու զավակների հետ բնակվում է Արամուս գյուղի 10 փ. 10 տնակում, որը զուրկ է կենցաղավարության տարրական պայմաններից: Ընտանիքի կրտսեր զավակը՝ Անգելինան (5տ.), Դաունի համախտանիշ ունի: Թեհմինեն շնորհակալություն հայտնեց «Արև-երեխաներ» ՀԿ-ին և աջակից անձին՝ ուշադրության ու աջակցության համար:

«Սեր ունեցողն Աստծո կամքն է կատարում և աշակերտում Քրիստոսին. «Եթե դուք միմյանց սիրեք, դրանով մարդիկ կիմանան, որ դուք Իմ աշակերտներն եք» (Հովհ. 13:35), սա է մարդկանց ուղղված աստվածային պատգամը: Սերը չի մրցակցում, չի զրպարտում ընկածին, եղբորը զրկանքի մեջ չի թողնում, այլ կարեկցում և հոգ է տանում նրա մասին»,- ասել է Ս. Եփրեմ Ասորին:

 

Կարինե Սուգիկյան

13.12.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․