14 Օգոստոս, Ուր, Աստվածածնի պահքի Ե օր

Գրքեր

Պատասխանատվությունը

Սրբիչը գլխին փաթաթած մի գործարար և բարեպաշտ մարդ ասում է.

- Աստվա՛ծ իմ, ինչքան աղոթում եմ, դեղ եմ խմում, գլխացավս չի անցնում: Արդեն չգիտեմ, թե ինչպես անել...

Նկատում է, որ իրեն ծանոթ մի երգիչ մի սայլ է քարշ տալիս, իսկ սայլը ծանրաբեռնված է մեծ ու փոքր ապրանքներով, իրերով: Եվ սայլի վրա ինչ-որ արարածներ են թռչկոտում ու նրանցից մեկն էլ, իբրև սայլապան, մտրակով հարվածում է երգչին ու դժգոհում.

- Արա՛գ, արա՛գ շարժվիր, մի ձիու չափ էլ չկաս, քանի անգամ քեզ ասեմ, որ ուղղություն վերցրու դեպի բարձունքը:

Գործարարը մոտենում է երգչին ու հարցնում, թե ինչ է կատարվում:

Բեռի ծանրությունից կքված ու լարված երգիչը դժվարությամբ պատասխանում է.

- Գնում եմ դեպի իրականացում, կյանքի իմաստավորում:

Սայլի մեջ լցրել եմ իմ նպատակներն ու ծրագրերը, խնդիրներն ու մտահոգությունները: Իսկ այս արարածներն իմ խորհրդատուներն են, որ ինձ հանգիստ չեն տալիս: Իսկ դու ինչո՞ւ ես գլխիդ սրբիչ փաթաթել.

Գործարարը հանում է սրբիչը և պատասխանում.

- Ես էլ քեզ պես մի սայլ էի քարշ տալիս, բայց հենց հիմա հասկացա, որ այլևս գլխացավ չունեմ, քանի որ ծրագրերի ու նպատակների ղեկավարն Աստված է, իսկ ինքս` աշխատող:

Մեզ մնում է գործել և աշխատել, իսկ իրականացումը թողնել Աստծուն: Մի կողմ թող այդ սայլը և խաղաղվիր ու ճանապարհդ առանց այդ սայլի շարունակիր:

 

Հովհաննես Մանուկյան

24.04.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․