«Փրկության ուղին դա սիրո ուղի է»

«Երբեմն մարդիկ փնտրում են, թե ինչ կարող են անել հանուն իրենց փրկության՝ շատ հաճախ չնկատելով այն ռեալ հնարավորությունները, որ իրենց կողքին են: Հնարավոր չէ փրկվել միայնակ, քանի որ փրկության ուղին դա սիրո ուղի է, իսկ սերը աշխարհով մեկ տարածվում է միայն սիրով: Կ. Պոլսի պատրիարք Հակոբ Բ Նալյանն (18-րդ դար) ասել է. «Քրիստոս Իր առաքյալներին մեռելներին հարություն տալու պատվեր չտվեց, այլ միմյանց սիրելու: Առանց սիրո չի օգնի ո՛չ մարտիրոսությունը, ո՛չ ունեցվածքի բաշխումը և ո՛չ էլ հրեշտակների քաղցրախոսությունը»: Ուստի, հարկ է բաց չթողնել բարին գործելու հնարավորությունները, քանի որ կարճ է և անցողիկ այս կյանքը»,-ասաց Զորավոր Սբ. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը:

Սոցիալական ծրագրերի շրջանակներում Զորավոր Սբ. Աստվածածին եկեղեցու համայնքը փորձում է հնարավորինս նկատել և իրագործել փրկագործությանն ուղղված այս հնարավորությունները: Հուլիսի 7-ին համայնքը, հոգևոր հովիվ Տեր Գրիգոր քահանա Գրիգորյան գլխավորությամբ, հերթական տնայցով եղավ Թոթովենցի 11/2 շենքի 14-րդ բն. ապրող Մնացականյան ընտանիքում: Չորս հոգուց բաղկացած ընտանիքը սոցիալապես ծանր վիճակում էր գտնվում: 33-ամյա Անժելա Մնացականյանի ամուսինը, հինգ ամիս առաջ արտագնա աշխատանքի մեկնելով, մոռացության է մատնել իր ընտանիքին: Անժելան նշեց, որ իր երկու զավակների հետ միասին երկար ժամանակ է, ինչ բնակվում է իր հայրական տանը: «Մեկ տարի առաջ, երբ հայրս մահացավ, մեր վիճակն ավելի ծանրացավ: Մեծ պարտքեր են կուտակվել: Մայրս առողջական խնդիրների պատճառով ի վիճակի չէ աշխատելու, ես էլ յոթ ամսեկան տղայիս խնամելուն զուգահեռ փորձում եմ ամսվա մեջ գոնե մի քանի օր աշխատել»,-ասաց Անժելան:

Տեր Գրիգորը բժշկության աղոթք կարդաց և ընտանիքին հանձնեց ամերիկաբնակ Կարեն Վարդանյանի աջակցությամբ գնված սննդի փաթեթներ և հիգիենիկ պարագաներ: Երախտապարտ և զգացված էր Մնացականյան ընտանիքը, որ Զորավոր Սբ. Աստվածածին եկեղեցու համայնքն արձագանքեց իրենց խնդիրներին և աջակից եղավ:

Կարինե Սուգիկյան