Գրքեր

Քանանացի կնոջ հավատը

«Հիսուս այդտեղից ելնելով՝ գնաց Տյուրոսի և Սիդոնի կողմերը: Եվ ահա, այդ շրջաններից եկած քանանացի մի կին աղաղակում էր ու ասում. «Ողորմիր ինձ, Տեր, Դավթի Որդի, աղջիկս չարաչար դիվահարվում է»: Բայց Նա նրան պատասխան չտվեց, և նրա աշակերտները մոտենալով՝ աղաչում էին Նրան ու ասում. «Արձակիր նրան, որովհետև մեր հետևից աղաղակում է»: Նա պատասխան տվեց և ասաց. «Այլ տեղ չեմ ուղարկված, եթե ոչ Իսրայելի տան կորուսյալ ոչխարների մոտ»: Իսկ կինը մոտենալով՝ երկրպագում էր Նրան ու ասում. «Տեր, օգնիր ինձ»: Նա պատասխանեց նրան և ասաց. «Լավ չէ մանուկների հացն առնել ու շներին գցել»: Եվ նա ասաց. «Այո, Տեր, որովհետև շներն էլ կերակրվում են իրենց տիրոջ սեղանից ընկած փշրանքներով»: Այն ժամանակ նրան պատասխանեց և ասաց. «Ով կին, մեծ է քո հավատը, թող քեզ լինի՝ ինչպես որ կամենում ես»: Եվ նրա դուստրը նույն ժամին բժշկվեց» (Մատթ. 15:21-28):                  

Որքան մեծ սքանչելիք: Քրիստոս բազմաթիվ հրաշքներ էր գործել Հրեաստանում, Գալիլիայում, բայց նրանք չէին ընդունում Տիրոջը, հալածում էին ու նեղությունների ենթարկում, իսկ երբ Նա եկավ օտարական մի երկիր՝ հեթանոսների մեջ՝ Տյուրոսի և Սիդոնի սահմանները, այս կինը, որ միայն լսել էր Քրիստոսի մասին և չէր էլ տեսել Նրա հրաշքները, իր սահմանից դուրս էր եկել, երկար ճանապարհ կտրել, որպեսզի Քրիստոսին գտնի: Եվ երբ գտավ, Նրան կոչեց Դավթի Որդի՝ ասելով. «Ողորմիր ինձ, Դավթի Որդի, աղջիկս չարաչար դիվահարվում է» (Մատթ. 15:22): Ում մոտ որ Հիսուս գնաց, նրանք (հրեաները) մերժվեցին: Իսկ նրանք, ովքեր մերժված էին ու երկար չարչարանքներ կրելով Քրիստոսի հետևից եկան, ընդունվեցին: Սա խորհրդանշում էր հրեաների մերժումը և հեթանոսների ընդունումն Աստծո ժողովրդի մեջ: Այդ կինը Քրիստոսին կոչեց Դավթի Որդի, որովհետև հիշել էր, որ Դավիթը քնար նվագելով Սավուղի միջից դևեր էր հանում, և ինքն էլ է դիմում Նրան և ասում, թե քանի որ Դավիթը քնար նվագելով, աղոթելով Սավուղի դևերին էր հալածում, հավատում է, որ Նա Դավթի Որդին է և Իր աղոթքներով կարող է իր դստեր միջից դևերին հանել: Բայց Քրիստոս ուշադրություն չդարձրեց: Եվ գիտեք, երբ մենք Տիրոջն ենք դիմում և մերժվում ենք, կարծես շատ ենք վիրավորվում, նեղվում: Բայց սա մարդկային է: Տերը գիտի մեր այցելության պահը, ժամը: Այս կինը մերժվեց, բայց երբեք ետ չկանգնեց, անդադար գնաց Քրիստոսի հետևից, և երկրորդ անգամ ընկավ Քրիստոսի ոտքերը: Առաքյալները միջնորդեցին նրա համար, բայց այդ միջնորդությունն էլ չանցավ, որովհետև Քրիստոս ասաց` արժանի չէ. «Ես չեմ եկել հեթանոսների մոտ, այլ Իսրայելի ժողովրդի մոտ»: Քրիստոս երկրորդ անգամ արգելք դրեց նրա առջև, բայց կինը չդադարեց աղաղակել, խնդրել ու պաղատել: Մոռացավ առաքյալներին, ինքն անձամբ եկավ, Քրիստոսի ոտքերն ընկավ և ասաց. «Տեր, ողորմիր իմ դստերը, չարաչար այսահարվում է»: Այնտեղ Քրիստոս Իր բերանով մերժեց նրան: Եթե մինչ այդ առաքյալների միջոցով էր մերժել, այս անգամ արգելք դրեց և ասաց. «Լավ չէ մանուկների հացը վերցնել, գցել շներին» (Մատթ.15:26): Քրիստոս հաց է կոչում Իր վարդապետությունը, և մանուկներ է կոչում Երկնքի Արքայության զավակներին: Եվ Իր վարդապետությունը արժանի չէ գողերի, շնացողների և անառակների առջև գցել, ինչպես մեկ այլ տեղ Քրիստոս ասում է. «Ձեր մարգարիտները խոզերի առաջ մի գցեք» (Մատթ. 7:6): Բայց այս պարագային մեծ էր թախանձանքն ու խնդրանքը, և կինն ասաց՝ այո, ես շուն եմ, այո, ես մեղավոր հեթանոսական շնացող ազգից եմ (քանզի ինչպես Սուրբ Գիրքն է ասում՝ շնանում էին հեթանոսները քարերի ու երկաթների հետ, այսինքն՝ իրենց Տեր Աստծուն թողած գնում էին և շնանում կուռքերի հետ, երկաթյա ու քարե արձաններ ու փայտե կուռքեր էին պաշտում, և այդ պատճառով կոչվում էին «շուն»): Այո, մենք բազմաթիվ մեղքեր ենք գործել, չարիքներ ենք արել, ճշմարիտ Աստծուն թողած դևեր ենք պաշտել, բայց այսօր մենք դարձի ենք եկել: Եվ ինչպես շունն է քծնում Տիրոջը, այդպես էլ մենք, խնդրում ենք. «Տեր, Քո սեղանի փշրանքներից գոնե մաս ու բաժին հանիր մեզ»: Բնականաբար Աստծո կողմից այսպիսի խնդրանքը չպետք է մերժվեր, և Քրիստոս ասաց. «Ով կին, մեծ է քո հավատը, թող քեզ լինի` ինչպես որ կամենում ես» (Մատթ. 15:28): Եվ անմիջապես նրա դուստրը բժշկվեց: Մենք էլ պաղատենք ու խնդրենք` ասելով. «Տեր, թեպետ մեծ չարիքներ գործեցինք, շնացանք, գողացանք, բայց դարձի ենք եկել, և ինչպես թախանձող մի շուն, խնդրում ենք, Քո սեղանի փշրանքներից մեզ մաս ու բաժին հանիր»: Ամեն:

 

 

Տեր Միքայել վարդապետ Գևորգյան 

15.01.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․