Գրքեր

«Քանի դեռ ժամանակը մեր ձեռքին է, բարիք անենք բոլորին»

ԱՀԹ առաջնորդական փոխանորդ գերաշնորհ Տեր Նավասարդ արք. Կճոյանի օրհնությամբ, 2012թ-ին սիրիահայ համայնքի հոգևոր հովիվ նշանակվեց Տեր Գրիգոր քահանա Գրիգորյանը: Սույն թվականից առ այսօր Տեր Հայրը սիրիահայ բազմաթիվ ընտանիքների է այցելում, տնօրհնեքներ կատարում՝ առավել ծանոթանալով նրանց հիմնախնդիրներին և կարիքներին: Փետրվարի 26-ին, Զորավոր Սբ. Աստվածածին եկեղեցու համայնքը, սոցիալական ծրագրի շրջանակներում, հոգևոր հովիվ Տեր Գրիգոր քահանա Գրիգորյանի գլխավորությամբ և ամերիկաբնակ Կարեն Վարդանյանի աջակցությամբ, հերթական՝ 12-րդ այցով եղավ Չեռնիշևսկի 37/1 հասցեում բնակվող սիրիահայ Բրուտյան ընտանիքում: Սիրիայում սկիզբ առած պատերազմական գործողությունների պատճառով 53-ամյա Սալբի Բրուտյանն՝ իր 11-ամյա որդու՝ Ջորջ Պոլիշադյանի հետ միասին տեղափոխվել են Հայաստան և արդեն երեք ու կես տարի է, որ հայրենիքում են: Սալբի Բրուտյանը Զորավոր Սբ. Աստվածածին եկեղեցու սիրիահայ համայնքի անդամ է: Սալբիի որդին՝ Ջորջը, սովորում է Երևանի թիվ 12 հատուկ դպրոցում: Բրուտյան ընտանիքը դժվարություններ ունի, քանի որ Սալբին մշտական աշխատանք չունի՝ թե՛ իրենց կարիքները հոգալու և թե՛ տան վարձը վճարելու համար:

«Չենք զղջացել, որ եկել ենք Հայաստան: Փառք Աստծուն այն ամենի համար, ինչ որ ունենք, միայն թե այս վիճակից առավել վատ չլինի»,-ասաց Սալբին:

Տեր Գրիգորը բժշկության աղոթք կարդաց, ապա ընտանիքին հանձնեց հիգիենայի և անկողնային պարագաներ, սննդի փաթեթներ և դրամական օգնություն: Հոգատար և ուշադիր վերաբերմունքի համար, Սալբին իր շնորհակալությունը հայտնեց Տեր Գրիգորին, եկեղեցու համայնքին և բոլոր աջակից անձանց:

Ողորմություն բաշխել կարող են ոչ միայն նյութապես ապահովվածները՝ կարիքավորներին դրամական օգնություն տալով, այլ ընդհանրապես բոլորը, ովքեր ցավակից են լինում նեղության, դժբախտության մեջ ընկածներին՝ փորձելով բարի գործով կամ խոսքով մխիթարել նրանց:

Քանի որ մարդը և՛ հոգի է, և՛ մարմին, ապա կարիք ունի հոգալու թե՛ մարմնավոր և թե՛ հոգևոր կարիքները: Հետևաբար ողորմածությունը լինում է երկու բնույթի՝ հոգևոր և մարմնավոր: Մեր եկեղեցու հայրերից Սբ. Գրիգոր Տաթևացին ասում է. «Ողորմությունը կամավոր ցավակցությունն է ուրիշների թշվառությանը: Ողորմությունը տասնչորս կերպ է իրականանում, որոնցից յոթը մարմնավոր են, յոթը՝ հոգևոր: Մարմնավոր են սրանք. քաղցածներին կերակրելը, ծարավին ջուր տալը, մերկին հագցնելը, օտարներին ժողովելը, գերվածներին փրկելը, հիվանդներին այցելելը, մեռածներին թաղելը: Առաջին վեցը Ավետարանն է սովորեցնում, յոթերորդը՝ աստվածաշնչյան Տոբիթի գիրքը: Իսկ հոգևոր ողորմություն է համարվում. նախ հանցավորին ներելը, մեղավորին հանդիմանելը, տգետներին ուսուցանելը, երկմիտներին խրատելը, տրտմածներին մխիթարելը, ընկերոջ փրկության համար աղոթելը, համբերելը սեփական անձի դեմ գործած անիրավություններին: Եվ այս վերջինը ողորմության գործ է ասում, որովհետև փափուկ և խոնարհ պատասխանը խորտակում է ընկերոջ բարկությունը և շահում նրան» (Սբ. Գրիգոր Տաթևացի «Գիրք Հարցմանց»):

 

Կարինե Սուգիկյան

26.02.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․