Քրիստոսի նախածնողները՝ Հովակիմ և Աննա | Qristosi Nakhatsnoghnery Hovakim Ev Anna



Գրքեր

Քրիստոսի նախածնողները՝ Հովակիմ և Աննա

Հովակիմն ու Աննան Սուրբ Մարիամ Աստվածածնի ծնողներն են: Քանի որ նրանց մասին Նոր Կտակարանում գրված չէ, ուստի նրանց մասին տեղեկություններ գիտենք եկեղեցու սրբազան ավանդությունից, որը հիմնականում ներկայացված է «Հակոբոսի նախավետարան» կոչվող պարականոն գրվածքում: Հովակիմը Դավթի ցեղից բարեպաշտ և մեծահարուստ մարդ էր, իսկ Աննան՝ քահանայական տնից, համեստ ու երկյուղած կին: Այս երկու արդար հոգիները բարեպաշտ, արդար, աստվածավախ ամուսիններ էին, ապրում էին Նազարեթ քաղաքում և զավակ չունեին, քանի որ Աննան ամուլ էր: Այն ժամանակ անզավակությունը մեծ նախատինք էր համարվում: Ուստի մի անգամ, երբ մի տոնի առիթով Հովակիմը նվեր է մատուցում տաճարում, քահանան նրան ասում է, որ նա պետք է ամենավերջում ընծան մատուցի, քանի որ զավակ չունի: Հովակիմը, խիստ վշտանալով, գնում է լեռ և այնտեղ տրվում աղոթքի և պահեցողության: Անդադրում, արցունքոտ լի աչքերով աղերսում է Աստծուն հանել իրենից անզավակության այդ անպատվելի վիճակից: Աղոթքը իր համար կերակուր էր, իսկ արցունքը՝ ըմպելիք: Աննան, տաճարում պատահածի մասին տեղեկանալով, լալագին արտասվում է և տրվում աղոթքի՝ Տիրոջ բարեգթությունը խնդրելով: Նա ուխտ է անում, որ եթե իրեն զավակ տրվի, կնվիրի Աստծուն:

Ամուսինները Գաբրիել հրեշտակապետի կողմից արժանանում են Աստծո նույն պատասխանին: Աննան հղիանում է և ծնում Մարիամին, որ նշանակում է լուսավորյալ, քանի որ նորածինը լույսի պես աղջիկ էր, «որով օրհնվեցին բոլոր ազգերը»: Ծնողները իրենց աստվածընծա մանկանը երեք տարի պահելուց հետո, ընծայում են Երուսաղեմի տաճարին: Մի քանի տարի հետո վախճանվում է Հովակիմը, ով արդեն ալեզարդ ծերունի էր և նրանից երկու տարի հետո կինը՝ Աննան: Իսկ, ըստ մեկ այլ ավանդության, Աննան ապրում է այնքան, մինչև տեսնում է իր թոռանը՝ Հիսուս Մանկանը:

Հովակիմի և Աննայի հիշատակը Հայ եկեղեցին տոնում է Յուղաբեր կանանց հետ, Վերափոխման իննօրյակին անմիջապես հաջորդող երեքշաբթի օրը:

 

Կազմեց Կարինե Սուգիկյանը

22.08.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․