19 Մարտ, Գշ, Մեծ պահքի ԼԷ օր

Գրքեր

Ս. Կոզմա և Ս. Դամիանոս երկվորյակ եղբայրները բժշկում էին ի փառս Աստծո

Անթիմոս, Ղևոնդիոս, Եվպրեպիոս, Կոզմա և Դամիանոս. հինգ եղբայրներ էին Արաբիայից, որոնք ապրել են 3-րդ դարի վերջում: Նրանց խնամել և դաստիարակել է առաքինի և քրիստոնյա մայրը՝ Թեոդոտիան (Աստվածապարգև): Ամուսնու մահից հետո նա ջանադրորեն ծառայել է Աստծուն՝ ապրելով աստվածահաճո կյանքով: Թեոդոտիան այնպիսին էր, ինչպիսին այն այրին, ում գովաբանում է Ս. Պողոս առաքյալը. «Իսկական այրին նա է, ով ոչ ոք չունի, իր հույսը դրել է միայն Աստծո վրա և գիշեր-ցերեկ իր ժամանակն անց է կացնում աղոթքով և խնդրանքով» (Ա Տիմոթեոս 5:5): Աստվածահաճո կյանքով ապրելով՝ նա նույնը և սովորեցրել է իր զավակներին՝ դաստիարակելով նրանց Ս. Գրքի համաձայն:

Եղբայրներից երկուսը՝ Կոզման և Դամիանոսը, երկվորյակ էին: Նրանք տիրապետում էին բժշկական արվեստին: Իրենց գիտության վրա Աստված ավելացրեց բժշկության շնորհը: Եղբայրներն, իրենց մոր հորդորով, ձրիաբար էին բուժում հիվանդներին՝ առաջնորդվելով ավետարանական հետևյալ պատգամով. «Բժշկեցե՛ք հիվանդներին, մաքրեցե՛ք բորոտներին, հանե՛ք չար ոգիներին. ձրի առաք, ձրի էլ տվե՛ք» (Մատթեոս 10:8): Ինչ որ անում էին իրենք, անում էին ոչ թե հանուն ոսկու և արծաթի, կամ հանուն իրենց փառքի, այլ ի փառս Տիրոջ՝ ցանկանալով մերձավորի հանդեպ սիրո միջոցով արտահայտել իրենց սերը Ամենակալի հանդեպ: Կոզման և Դամիանոսը շրջում էին քաղաքից քաղաք, Տիրոջ ողորմածությամբ կույրերին տեսողություն էին տալիս, կաղերին քայլեցնում, հաշմանդամներին առողջացնում, դևերին հալածում էին և ամեն տեղ ուրախություն, առողջություն և խաղաղություն տարածում:

Նրանք երբեք իրենց կատարած բժշկության դիմաց գումար չէին վերցնում: Եվ քանի որ այս ամենն առանց վարձքի էին կատարում, այդ պատճառով հավատացյալների կողմից նրանք ստացան «անարծաթ» բժիշկներ անվանումը:

Երկու եղբայրները քաջալերում էին հիվանդներին ապավինել Հիսուս Քրիստոսին, որպեսզի Տիրոջ հավատով բուժվեն: Նրանք միայն մարդկանց չէ, որ բուժում էին, այլ նաև կենդանիներին: Եղբայրների համար Աստծո բոլոր արարածները կարևոր էին: Կոզման ու Դամանիոսը բավականին հարստություն էին ժառանգել ծնողներից: Նրանք մարդկանց անվճար բուժելուց բացի, աղքատներին գումար էին բաշխում:

Այդ օրերին մյուս քրիստոնյաների նման Կոզմաjին և Դամիանոսին ձերբակալեցին և շղթայված բերեցին Գալերիոս կայսեր առջև: Նրանց սպառնացին ուրանալ քրիստոնեական հավատը, սակայն եղբայրները մնացին անսասան ու անհողդողդ: Նրանք ոչ միայն մերժեցին երկրպագել կուռքերին, այլ նաև դիմեցին կայսրին՝ ասելով. «Եթե վարպետները չքանդակեին քո կուռքերը, դուք պաշտելու այլ բան չէիք ունենա»: Կայսրը տեսնելով Կոզմաjի և Դամիանոսի քաջությունը՝ հրամայեց ազատ արձակել նրանց և ինքն էլ դարձավ քրիստոնյա: Քանի որ համոզվեց, որ միայն ճշմարիտ Աստված կկարողանար եղբայրներին այդպիսի զորություն և մյուսներին սիրելու շնորհ պարգևել:

Կոզման և Դամիանոսը շարունակեցին բուժել հիվանդներին և օգնել աղքատներին: Նրանք հորդորում էին բոլորին ապավինել Աստծուն և սիրել Նրան ամեն բանից վեր: Նրանց հռչակը տարածվեց ամբողջ երկրում, և մարդիկ երախտապարտ էին նրանց, քանի որ պատրաստակամորեն բժշկում էին ամենքին:

Մեկը, որ ժամանակին եղել էր նրանց ուսուցիչը, սկսում է նախանձել եղբայրներին: Նախանձը հետզհետե փոխվում է ատելության: Մի օր նա հրավիրում է նրանց բարձրանալ մոտակա սարերը՝ դեղաբույսեր և օգտակար արմատներ հավաքելու: Լեռների հանդարտ մենության մեջ նա սպանում է եղբայրներին:

Կոզմա և Դամիանոս եղբայրները մահացան իբրև ճշմարիտ քրիստոնյաներ, ովքեր բուժում և հույս էին ներշնչում բոլոր կարիքավորներին: Նրանց մարմիններն ամփոփել են Ֆերեման քաղաքում, ուր և նրանց անունով եկեղեցի է կառուցվել: Տարբեր երկրներից այդ եկեղեցի ուխտի եկած հիվանդները սրբերի բարեխոսությամբ բժշկություն են ստացել Տիրոջից:

Հռչակավոր իտալացի նկարիչներ Ջոտտո դի Բոնդոնեի և Ֆռա Անջելիկոյի ստեղծագործությունների հերոսներից են նաև Ս. Կոզմա և Ս. Դամիանոս անարծաթ բժիշկ-եղբայրները:

 

Կազմեց Գայանե Սուգիկյանը

06.09.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․