26 Փետրվար, Դշ, Մեծ Պահքի Գ օր

Գրքեր

Սաղմոս ՃԺԲ

Ալելուիա. Սա անմեղների օրհնությունն է, քանզի առավոտյան Դավիթը խորան գնաց և տեսավ, որ լուռ են երգողների և քահանաների դասերը, և ասաց. Երգեցե՛ք, մանուկնե՛ր, Տիրոջը: Դարձյալ՝ Զորաբաբելի վրա է նաև կատարվում:

 

1. Օրհնեցէ՛ք, մանկունք, զՏէր. և օրհնեցէք զանուն Տեառն:

Օրհնեցե՛ք Տիրոջը, մանուկնե՛ր, օրհնեցե՛ք անունը Տիրոջ:

Մանուկներ ոչ թե երեխաներին է ասում, այլ՝ արիներին, արթուններին և քաջերին: Նաև ինչպես Ակյուղասն ու Սիմաքոսն են ասում, եբրայերեն «աբդոն» է, այսինքն՝ ծառա, որոնք քահանաներն են, իսկ այստեղ՝ Քրիստոսի արյամբ գնվածները: Օրհնեցեք անունը Տիրոջ. թեև չենք ճանաչում [Աստծու] բնությունը, սակայն [ասում է] օրհնեցե՛ք անունը, և ինքը կառաջնորդի:

2. Եղիցի անուն Տեառն օրհնեալ, յայսմ հետէ մինչև յաիւտեան:

Թող Տիրոջ անունն օրհնյալ լինի այսուհետև մինչև հավիտյան:

Տիրոջ բոլոր անուններն օրհնում ենք, որ բոլորիս բյուրավոր բարիքներ են բաշխում: Այսուհետև, որ Քրիստոսով անմահ եղանք հույսով մինչև հավիտյան:

3. Յարևելից մինչև ի մուտս արևու՝ օրհնեալ է անուն Տեառն:

Արևելքից մինչև արևմուտք օրհնյալ լինի Տիրոջ անունը:

Սա նաև ինքը՝ Աստված ասաց. «Հոժարակամ չեմ ձեր նկատմամբ, և զոհ չեմ ընդունի ձեր ձեռքից, քանզի արևաձագից մինչև մայրամուտ իմ անունը փառավորված է» (Մաղաք. 1:10-11), քանզի հեթանոսներն էլ անգիտաբար օրհնում էին Աստծու անունը՝ դնելով կուռքերի վրա, այն, որ Աստծուն էր վայել պաշտամունք, այլ ոչ թե անշունչներին:

4. Բարձր է ի վերայ ամենայն ազգաց Տէր. և յերկինս են փառք նորա:

Բարձր է Տերը բոլոր ազգերից, և երկնքում է նրա փառքը:

Տիրոջ գալստյամբ և խաչ բարձրանալով բոլոր ազգերն իմացան արեգակի խավարմամբ և երկրաշարժով, և երկնքում է փառքը նրա. ինչպես որ քերովբեներն են ասում. «Օրհնյալ է Տիրոջ փառքը իր բնակատեղիում» (Եզեկ. 3:12):

5. Ո՞վ է որպէս Տէր Աստուած մեր, ի բարձունս բնակեալ. և զխոնարհս տեսանէ յերկինս և յերկրի:

Ո՞վ է նման մեր Տեր Աստծուն, որ բնակվում է բարձունքներում: Նա տեսնում է խոնարհներին երկնքում ու երկրի վրա:

Որ բնակվում է բարձունքներում, որտեղ հանգչում է, այլ ոչ թե պարփակվում: Նա տեսնում է խոնարհներին, քանզի որքան բարձր է երկինքը երկրից, այդքան էլ Աստված բարձր է երկնքից, և թեև նրա ձեռքում են իմանալիներն ու զգալիները, բայց այսպես է ասում, քանի որ արարածներն Արարչից ցածր են:

6. Յարուցանէ զաղքատս յերկրէ. և բարձր առնէ զտառապեալս յաղբևաց:

Աղքատներին բարձրացնում է գետնից, և տառապյալներին վեր հանում աղբանոցից:

Մովսեսին, Դավթին, Սամուելին, Զորաբաբելին: Վեր հանում՝ հեթանոսներին, որոնք տառապանքով խոնարհ շրջում էին՝ գտնելու Աստծուն, և մեղքերի գարշահոտ աղբի մեջ էին, ուստի և նա իրեն բարձրացնելով առավել վեր, քան նրանք էին կարծում, իրենց էլ է բարձրացնում՝ հրեշտակների հետ նստեցնելով:

7. Նստուցանէ զնոսա իշխանս ընդ իշխանս ժողովրդեան իւրոյ:

Նրանց որպես իշխան նստեցնում է իր ժողովրդի իշխանների կողքին:

Հրեաների առաջնորդներին աղքատների միջից ընտրելով: Իր ժողովրդի իշխանների կողքին՝ քահանաների հետ նստելով, իսկ հեթանոսներին՝ առաքյալների հետ՝ իշխանություն ունենալով դևերի, ցավերի և ախտերի վրա:

8. Բնակեցուցանէ զամուլն ի տան ուրախամիտ, որպէս մայր որդոց բերկրեալ:

Ամուլ կնոջը բնակեցնում է ցնծալից տան մեջ՝ իբրև մայր, որ հրճվում է զավակներով:

Սառային, Ռեբեկային, Աննային, Եղիսաբեթին եկեղեցում՝ վերին Երուսաղեմում բնակեցնելով, ինչպես նա՝ իր զավակներով բերկրելով:

 

 

Վարդան ԱրևելցիՄեկնութիւն Սաղմոսացն ԴաւթիԷջմիածին, 1797 թ.

Գրաբարից թարգմանեց Գայանե Թերզյանը

 

07.10.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․