20 Նոյեմբեր, Գշ, Հիսնակաց պահքի Բ օր

Գրքեր

Սաղմոս ԾԱ

Ի կատարած իմաստության սաղմոս Դավթի: Այն ժամանակ, երբ Դովեկ Եդոմայեցին եկավ պատմեց Սավուղին, թե ահա Դավիթն Աքիմելիքի տանն է:

Դովեկը, որ Եսավի որդիների՝ եդոմայեցիների մոտից էր եկել Սավուղի մոտ և թլփատվել էր և հաճոյացել նրա առաջ, մատնում է Դավթին՝ ասելով, թե նա եկել է Աքիմելիքի մոտ և նրանից հաց ու սուր վերցրել և հարցրել Տիրոջից: Սավուղը բարկանում է և Դովեկին հրամայում կոտորել երեք հարյուր հինգ քահանայի, այդ ժամանակ Դավիթը երգում է և ասում.

1. Զի՞ պարծիցի ի չարութեան հզօր՝ զանօրէնութիւն. զօրհանապազ զանիրաւութիւն խորհեցաւ ի լեզուի իւրում:

Ինչո՞ւ է հզորը պարծենում չարությամբ և անօրենությամբ: Գիշեր-ցերեկ նա անիրավություն նյութեց իր լեզվով:

Որ իր համար նախատինք է և կորստյան պատճառ: Եվ ունի նորից՝ Եզեկիայի չարչարանքները, որով պարծենում էր Ռափսակը, իսկ այստեղ՝ Սավուղն ու Դովեկը: Հզորը՝ անօրինությամբ. անօրինությունը զենք է դարձրել, գիշեր-ցերեկ նյութելով իր լեզվով:

2. Որպէս ածելի սուր՝ սրեաց զնենգութիւն, սիրեաց զչարութիւն քան զբարութիւն. զանօրէնութիւն քան զխօսս արդարութեան:

Սուր ածելու նման նենգությունը սրեց: Բարությունից ավելի չարություն սիրեց և արդար խոսքից ավելի՝ անօրինություն:

Մատնիչ Դովեկը սրեց այն նենգությունը, որ ուներ Սավուղը Դավթի հանդեպ և սիրում էր այդ, ինչպես որ սատանան՝ անօրինությունը, արդար խոսքից առավել, որ քահանան ասաց, թե չեմ մեղանչել:

3. Սիրեաց նա զամենայն խօսս կործանման, և զլեզուս նենգաւորս:

Սիրեց նա ամեն տեսակ կործանարար խոսքեր և նենգ լեզուներ:

Նաև դրանով իրեն կործանեց: Եվ նենգ լեզուներ [ասելով նկատի ունի] Դովեկին և զիփացիներին:

4. Վասն այսորիկ Աստուած կործանեսցէ զնա իսպառ, խլեսցէ և հանցէ զնա յարկաց իւրոց, և զարմատս նորա յերկրէն կենդանեաց:

Դրա համար Աստված կկործանի նրան իսպառ, կխլի և կհանի նրան իր օթևանից, և նրա արմատները՝ ողջերի երկրից:

Սենեքերիմին, Սավուղին՝ թագավորությունից, որ սատանային է պատշաճում, և որ Քրիստոսը կործանեց օթևանից՝ խլելով իր տեղից, իսկ այստեղ՝ կախարդներից: Եվ նրա արմատները, որպեսզի այլևս ոչ ոք չլինի նրանց նման: Ողջերի երկրից, որտեղ կենդանի Աստվածն է պաշտվում:

5. Տեսցեն արդարք և երկիցեն, զնովաւ ծիծաղեսցին, և ասասցեն:

Արդարները կտեսնեն և կվախենան, կծաղրեն նրան ու կասեն.

Կտեսնեն նրա պատիժը և կվախենան, ինչպես որ առակում է ասվում, թե «Անզգամի պատիժը տեսնելով՝ անմեղն ավելի խելացի է դառնում» (Առակ. 19:25): Կծաղրեն նրան. հրեշտակները՝ սատանային, քանզի նրանց խաղալիքն է: Թեև Դավիթն այդպես չարեց, այլ սգաց նրա վրա, սակայն ոմանք կային, որ ասացին.

6. Այս այր է, որ ո՛չ արար զԱստուած իւր օգնական, այլ յուսացաւ սա ի բազում մեծութեան իւր, և զօրացաւ ի նանրութեան իւրում:

«Սա է այն մարդը, որն Աստծո օգնությանը չապավինեց, այլ հույսը դրեց իր մեծ հարստության վրա և զորացավ իր ունայնությամբ»:

Եզեկիան Սենեքերիմի համար ասաց, իսկ Դավիթը Գողիաթի, քանզի Գողիաթն իր զորության վրա հույս դրեց, իսկ Սենեքերիմը՝ իր զորքերի:

7. Այլ ես որպէս ձիթենի պտղալից ի տան Աստուծոյ. յուսացայ յողորմութիւն Աստուծոյ յաւիտեան և յաւիտեանս յաւիտենից:

Իսկ ես Աստծո տան պտղաբեր ձիթենու նման եմ. հավիտյան և հավիտյանս հավիտենից հույսս դրի Աստծո ողորմության վրա:

Ձիթենու պես են՝ առատ պտուղներով և տերևներով, քանզի այստեղ և այնտեղ փառավորված են բոլոր արդարները, մարգարեները, առաքյալները և սրբերը, որոնց ցանկանում է նմանվել և այդպես էլ եղավ:

8. Խոստովան եղէց քեզ Տէր յաւիտեան, զի արարեր, և համբերից անուան քում, զի քաղցր ես առաջի սրբոց քոց:

Քեզ հավիտյան գոհություն պիտի մատուցեմ արածիդ համար և հույսս պիտի դնեմ քո անվան վրա, քանզի բարի ես սրբերիդ հանդեպ:

Որ իմ դատաստանը տեսար: Հույսս պիտի դնեմ քո անվան վրա, որովհետև երկայնամիտ ես կոչվում և մենք էլ պետք է համբերենք: Քանզի բարի ես սրբերիդ հանդեպ. ինչպես Դավթի, Եզեկիայի, Քրիստոսին հավատացողների, նաև ոչ սրբերի [հանդեպ], ինչը, սակայն, հայտնի չէ:

 

 

Վարդան Արևելցի, Մեկնութիւն Սաղմոսացն Դաւթի, Էջմիածին, 1797 թ.

Գրաբարից թարգմանեց Գայանե Թերզյանը

15.05.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․