Գրքեր

Սիրիահայերի աղոթքի և փառաբանության ուղին

Սեպտեմբերի 11-ին՝ Խաչվերացի տոնին ընդառաջ, Զորավոր Ս. Աստվածածին եկեղեցու սիրիահայ համայնքը, ԱՀԹ առաջնորդական փոխանորդ Գերաշնորհ Տեր Նավասարդ արք. Կճոյանի օրհնությամբ և սպասավոր Վաչագան սարկավագ Դոխոլյանի ուղեկցությամբ, ուխտագնացության մեկնեց Կոտայքի թեմի սրբավայրեր: Քրիստոսի հետևորդը հետևում է Տիրոջ այն խոսքին, որ ասում է. «Եթե մեկը կամենում է հետևել ինձ, թող ուրանա իր անձը, վերցնի իր խաչը և գա իմ հետևից» (Մատթ. 16:24): Խաչի ճանապարհով դեպի Կյանք ընթացողը համբերությամբ և ուրախությամբ կրում է իր խաչը՝ քաջատեղյակ լինելով նրա զորությանը. «Քա՛վ լիցի, որ ես մեր Տիրոջ՝ Հիսուս Քրիստոսի խաչից բացի ուրիշ բանով պարծենամ» (Գաղ. 6:14): Ս. Խաչի զորությանն ապավինած սիրիահայերի աղոթքի ուղին նախ կանգ առավ Աբովյան քաղաքի Ս. Հովհաննես եկեղեցում, ուր ուխտավորները միասնական աղոթքից հետո շարականներ երգեցին, ապա ծանոթացան եկեղեցու պատմությանը: Հաջորդ սրբավայրում՝ Ակունք գյուղի Ս. Պողոս-Պետրոս մատուռ-սրբավայրում, սիրիահայ ուխտավորները ևս ապրեցին միասնական աղոթքի խորությունն ու զորությունը:

Սիրահայ ուխտավորների համար Խաչվերացի տոնին նախորդող շաբաթապահքի ընթացքում աղոթքի ճանապարհ անցնելը լավագույն առիթ էր խոկալու իրենց անցած և անցնելիք խաչի ճանապարհի մասին: Իսկ խաչի ճանապարհին, խաչը կրելով, դեպի Երկինք բարձրանալը, ըստ Հայր Պաիսիոս Աթոսացու, փառաբանության ուղի է, քանի որ. «Բարեգութ Աստված ամեն մեկին իր ուժերի չափով է խաչ տալիս: Աստված մարդուն խաչ չի տալիս, որպեսզի տանջվի, այլ, որպեսզի այդ խաչից Երկինք բարձրանա: Քանի որ, խաչը՝ դա Երկինք տանող աստիճան է՝ ըստ էության: Հասկանալով, թե փորձությունների ցավին համբերելով ինչպիսի հարստություն ենք կուտակում (երկնային) գանձարանում՝ մենք կդադարենք տրտնջալ և կփառաբանենք Աստծուն՝ մեզ վրա վերցնելով այն փոքրիկ խաչը, որ Նա պարգևել է մեզ»:

 

Կարինե Սուգիկյան

11.09.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․