Գրքեր

Սիրիահայերի ուխտի հոգենորոգ օրը

Ըստ Հայ Առաքելական Սուրբ եկեղեցու տոնացույցի՝ Մեծ պահքն արդեն կիսվել է, և քրիստոնյան շարունակում է ապաշխարության ճանապարհի մյուս կեսն անցել՝ ընթանալով դեպի Սուրբ Հարություն: Պահեցողության այս ճանապարհին Տիրոջով զորանալու մեծ փափագն էր, որ ապրիլի 3-ին Զորավոր Ս. Աստվածածին եկեղեցու սիրիահայ համայնքի աղոթքի ուղին հարթեց դեպի Արտաշատի տարածարաշրջանի Մրգավան գյուղի Ս. Հակոբ եկեղեցի: ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ՝ թվով հիսուն ուխտավորներ աղոթքի և խոկման ուղի անցան: Հասնելով սրբավայր՝ նրանք, եկեղեցու հոգևոր հովիվ Տեր Պարգև քահանա Պալգևորգյանի գլխավորությամբ, մասնակցեցին Արևագալի ժամերգությանը, որ առավել հանդիսավորությամբ կատարվում է Մեծ պահքի շրջանում՝ չորեքշաբթի և ուրբաթ օրերին: Ժամերգության ընթացքում «Փառաւորեսցուք» քարոզով սարկավագը հորդորեց ներկաներին փառավորել Աստծուն, ապա քահանան ընթերցեց «Զառաւոտու աղօթս» աղոթքը և խնդրեց Աստծուց, որպեսզի առավոտյան աղոթքն ու պաշտամունքը ընդունի Իր անապական և երկնային խորաններում և արդարության ու իմաստության լույսը ծագեցնի հավատացյալների վրա: Եվ նրանք, լույսի որդիներ լինելով, կարողանան երկյուղածությամբ և առանց գայթակղության ապրեն իրենց կյանքը:

Ճշմարտությամբ աղոթողն իր հոգու պատուհանն է բացում Ճշմարտության Արեգակի առջև, որպեսզի Նրանով լուսավորվելով՝ կարողանա Նրան ծառայել և բարեպաշտության մեջ առաջադիմել: Ժամերգության ավարտին ներկաները «Տեր ողորմեա»-ն երգեցին և խնդրեցին Ս. Հակոբի բարեխոսությունը: Այնուհետև Տեր Պարգևը սիրիահայ ուխտավորների հետ պահեցողության վերաբերյալ զրույց ունեցավ և պատասխանեց նրանց հուզող հարցերին: Հոգեշահ զրույցից հետո ուխտավորները եկեղեցու բակում սիրո ճաշը վայելեցին:

Քրիստոսի հետևորդն իրենց անցնելիք ճանապարհին կարիք ունի պարբերաբար կանգ առնելու, հանգստանալու, աղոթքով և խոկումով Տիրոջով պայծառանալու, մաքրվելու և կրկին վերահաստատվելու աստվածահաճո կյանքի ընթացքի մեջ: Ուխտի հոգեներոգ օրն ավարտվեց, և սիրիահայ ուխտավորներն իրենց ընտանիքներ վերադարձան՝ հոգեպես նորոգված և զորացած:

 

Կարինե Սուգիկյան

03.04.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․