Սիրիահայերին բաշխվեց հումանիտար Ամանորյա օգնություն

ԱՀԹ առաջնորդարանի դահլիճում դեկտեմբերի 25-ին առաջնորդական փոխանորդ Տեր Նավասարդ արքեպիսկոպոս Կճոյանի օրհնությամբ, Զորավոր Սբ. Աստվածածին և սիրիահայ համայնքի հոգևոր հովիվ Տեր Գրիգոր քահանա Գրիգորյանի նախաձեռնությամբ ԵՀԽ Հայաստանյան Կլոր սեղան հիմնադրամը Ամանորի նախաշեմին քսան սիրիահայ ընտանիքների հանձնեց 20 հազար դրամ արժեքով կտրոններ: Հումանիտար Ամանորյա այս օգնությունն իրականցվեց հիմնադրամի զարգացման ծրագրի շրջանակներում:

Սիրիահայ ընտանիքների հետ հանդիպումը Սրբազան Հայրը սկսեց «Տերունական աղոթք»-ով, ողջունեց Տեր Գրիգորի նախաձեռնությունը և իր գոհունակությունը հայտնեց ԵՀԽ Հայաստանյան Կլոր սեղան հիմնադրամին իրականացված ծրագրի համար:

Ապա Տեր Գրիգորը շնորհակալություն հայտնեց Սրբազան Հորը, ում օրհնությանն ու աջակցությանն արժանացան 2012 թ-ին Հայաստան արտագաղթած սիրիահայ բազմաթիվ ընտանիքներ: Տեր Հայրը շնորհակալություն հայտնեց նաև ԵՀԽ Հայաստանյան Կլոր սեղան հիմնադրամին, որի աջակցությամբ այս տարիների ընթացքում արձանագրված 1000 սիրիահայ ընտանիքներ մասնակցեցին երկու նմանատիպ և այլ բարեգործական ծրագրերի՝ ստանալով հոգևոր-հոգեբանական աջակցություն: Ինչպես նշեց Տեր Գրիգորը, այսօր սիրիահայ 100 ընտանիք ներգրավված են Զորավոր Սբ. Աստվածածին եկեղեցու համայնքային կյանքից ներս և արդեն կես տարի ամեն ուրբաթ Վաչագան սարկավագ Դոխոլյանն արևմտահայերենով քարոզխոսություն է անցկացնում սիրիահայերի համար: «Նպաստավոր ամեն պայման ստեղծվում է, որ սիրիահայերը պահպանեն իրենց ավանդույթները: Եկեղեցում գործում է նաև «Հույս միավոր» տիկնանց օժանդակ միությունը: Օր օրի ավելանում է սիրիահայերի թիվը՝ կազմելով մի մեծ ընտանիք»,- ասաց Տեր Հայրը:

ԵՀԽ Հայաստանյան Կլոր սեղան հիմնադրամի բոլոր ծրագրերի գլխավոր կոմպոնենտը սոցիալ-հոգեբանական աջակցությունն է աղետից տուժած մարդկանց: Եվ ծրագրերի պատասխանատուներից Ալլա Սարգիսովան նշեց, որ 2012 թ-ից հումանիտար օգնության ոլորտում նորամուծություն է օգնությունը կտրոնների տեսքով, ինչը հնարավորություն է տալիս շահառուին ազատ ընտրելու իրեն անհրաժեշտ սննդամթերքը, բացի ալկոհոլից և ծխախոտից: Տիկին Ալլան հավելեց. «Տարեցտարի սիրիահայ ընտանիքների թվի ավելացման հետ կապված նվազեց կտրոնների տեսքով տրվող գումարի չափը: Տարիների ընթացքում էլ համոզվեցինք, որ հումանիտար օգնությանը զուգահեռ շատ կարևոր և անհրաժեշտ է լուծել սիրիահայերի մասնագիտական և աշխատանքի հետ կապված հարցերը: Այս առումով կատարված ծրագրերի արդյունքում սիրիահայերից շատերը, մասնագիտություն ստանալով, աշխատանք ձեռք բերեցին»:

«Հույս միավոր» տիկնանց միության փոխատենապետուհի Քնարիկ Ղազարյանը սիրիահայերի անունից շնորհակալություն հայտնեց Սրբազան Հորը, Տեր Գրիգորին, Վաչագան սարկավագին և Հայաստանյան Կլոր սեղան հիմնադրամին իրենց ցուցաբերած աջակցության համար:

Ի պատասխան շնորհակալության՝ Սրբազան Հայրն ասաց. «Մենք ենք շնորհակալ, որ ասպնջական ափերի մեջ հայ մնացիք՝ պահպանելով ձեր ազգային պատկանելիությունը և ինքնությունը: Կյանքի բերումով, Հայաստան գալով, հարստացրիք մեր հայկական կյանքը: Հուսահատական տրամադրությունները թող ձեզ չպարուրեն, ուժ և կորով ստանաք հայրենի հողի վրա՝ մշտապես կարևորելով Հայոց երկրի գերագույն արժեքը»:

Կարինե Սուգիկյան