Գրքեր

Տեր Գրիգոր քհն. Գրիգորյանի շնորհավորական խոսքն Ավետման տոնի կապակցությամբ

Հեզահամբույր մայրեր, քույրեր և դուստրեր,

Սրտաբուխ շնորհավորանքներս եմ հղում ամենքիդ՝ Սուրբ Աստվածածնի ավետման աստվածապարգև տոնի կապակցությամբ, որն էլ հիմք է հանդիսացել մայրության և գեղեցկության արևաբույր տոնի:

Ամեն տարի գարնանային այս լուսաշող օրը Հայ Առաքելական Սուրբ Եկեղեցին մեծ հանդիսավորությամբ նշում է Սուրբ Աստվածամոր երկրային կյանքում կատարված կարևորագույն իրադարձություններից մեկը, որը նույնպիսի կարևորություն ունի նաև յուրաքանչյուր քրիստոնյայի կյանքում: Այս օրն Ամենայնի Արարարիչ Տերն իր մեծագույն շնորհի՝ մարդկության Փրկչի ծննդյան ավետիսն ուղարկեց դեռատի Կույսին, ով չնայած այն հանգամանքին, որ չպատկերացրեց անգամ, թե ինչպես է հնարավոր այն, ինչ Տիրոջ պատգամաբերն իրեն հայտնեց, բայց իր սուրբ սրտում ունեցած խոնարհությամբ առաջնորդվելով՝ ընդունեց Ամենակալի կամքն ու ենթարկվեց դրան:

Հայոց Աշխարհի տիկնայք միշտ էլ զարդարված են եղել հայ կնոջը վայել խոնարհությամբ, քնքշությամբ ու հեզությամբ, և միշտ վեհությամբ են կրել աստվածապատգամ այդ զարդերը: Հայ մայրերը դաստիարակել են ազնիվ, քաջ ու հայրենանվեր որդիներ: Հայ կանայք ու քույրերը միշտ էլ անվեհերությամբ կանգնած են եղել իրենց այրերի ու եղբայրների կողքին՝ որպես հավատարիմ օգնականներ: Հայ դուստրերն իրենց հնազանդությամբ, անաղարտությամբ և բարի վարքով միշտ բարձր են պահել իրենց հայրերի գլուխները: Եվ ես այսօր մաղթում եմ, որպեսզի ազգային այս գեղեցիկ գծերը, քրիստոնեական սուրբ հավատով տոգորված, շարունակեն ապրել և ծլարձակել հայ կանանց ու աղջիկների սրտերում, քանզի նրանց փխրուն ուսերն են կրում արժանապատիվ սերունդներ դաստիարակելու քաղցր բեռը:

Թող Աստծո Անթառամ Ծաղկի աստվածահաճո սուրբ կյանքի օրինակն օգնի ձեզ հաղթահարելու ձեր ընտրած ուղու վրա հանդիպող բոլոր դժվարությունները, սիրելինե՛ր: Նրա բարեխոսությունն իր Միածնի առջև ուժ և տոկունություն պարգևի ձեր նուրբ հոգիներին՝ համբերելու ձեր առջև ծառացած փորձություններին: Թող Անարատ Կույսի լուսապայծառ կերպարը միշտ ջերմացնի ձեր սրտերը և ուղղորդի փրկության ճանապարհին: Ես էլ աղաչում եմ Սրբուհի Մարիամ Աստվածածնին, որպեսզի բարեխոսի Տեր Հիսուս Քրիստոսի առջև պահապան և զորավիգ լինելու ձեզ և ձեր զավակներին: Թող Աստծո ամենազոր խաչի նշանի, խաղաղ և անամպ երկնքի ներքո ծաղկեն ձեր ընտանիքները, արմատավորվեն հայրենի բարեբեր հողում և բարի պտուղներ տան ի փառս Աստծո և հայրենիքի: Ամեն:

«Թող ձեր արտաքի՛նը զարդարված չլինի հյուսքերով, ոսկեհուռ վարսակալներով կամ պճնագեղ զգեստներովայլ սրտի ներսի՛ մարդը՝ հեզ և հանդարտ հոգու անեղծությամբ, ինչ որ շատ ավելի արժեք է ներկայացնում Աստծու առաջ» (Ա Պետ. 3:3, 4)

 

Տեր Գրիգոր քհն. Գրիգորյան

Զորավոր Սուրբ Աստվածածին եկեղեցու հոգևոր հովիվ

07.04.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․